യുവേഫ നേഷൻസ് ലീഗിലെ ഇറ്റലി – പോർച്ചുഗൽ മത്സരത്തിനിടെ ഇറ്റാലിയൻ താരം ബൊനുച്ചിയെ കൂവി വിളിച്ച് മിലാൻ ആരാധകർ. മിലാൻ ആരാധകരുടെ പ്രതിഷേധത്തിന്റെ ഭാഗമായാണ് യുവന്റസ് താരത്തിന് കൂവൽ കിട്ടിയത്. മത്സരത്തിനിടെ പതിനഞ്ച് മിനുട്ടോളം ആരാധകർ പ്രതിഷേധം തുടർന്നു. കഴിഞ്ഞ സീസണിൽ മിലാനിൽ എത്തിയ ബൊനൂച്ചി ഈ സീസണിൽ തിരികെ യുവന്റസിലേക്ക് പോയിരുന്നു.
ഗോൺസാലോ ഹിഗ്വെയിനുമായുള്ള സ്വാപ്പ് ഡീലിന്റെ ഭാഗമായാണ് ടൂറിനിലേക്ക് താരം തിരികെ പോയത്. എങ്കിലും മിലാൻ ആരാധകർ ബൊനൂച്ചിയുടെ ക്ലബ്ബ് മാറ്റത്തിനെതിരെ രൂക്ഷമായാണ് പ്രതികരിച്ചത്. ഇന്ന് മത്സരം നടന്നത് മിലാന്റെ ഹോം ഗ്രൗണ്ട് ആയ സാൻ സൈറോയിലായിരുന്നു. ഇത്തരത്തിലുള്ള പ്രതിഷേധങ്ങൾ ഉണ്ടാവുമെന്ന് മുൻപ് തന്നെ സൂചനയുണ്ടായിരുന്നു.