ടോക്കിയോ ഒളിമ്പിക്സിൽ ഇന്ത്യയുടെ ആറാം മെഡല്‍ നേടി ബജ്രംഗ് പൂനിയ. ഇന്ന് നടന്ന വെങ്കല മെഡൽ മത്സരത്തിൽ പൂനിയ 8-0ന് ആണ് വിജയം നേടിയത്. ഗുസ്തിയിൽ ഇന്ത്യ നേടുന്ന രണ്ടാമത്തെ മെഡലാണ് ഇത്.
രണ്ടും മൂന്നും സീഡുകളുടെ പോരാട്ടമായിരുന്നു ഇന്ന് വെങ്കല മെഡൽ മത്സരങ്ങളിൽ രണ്ടാമത്തേതിൽ കണ്ടത്. ഇന്ത്യയുടെ ബജ്രംഗ് പൂനിയ രണ്ടാം സീഡായിരുന്നു. കസാക്കിസ്ഥാന്റെ ദൗലത്ത് നിയാസ്ബെക്കോവ് ആയിരുന്നു ഇന്ത്യയുടെ എതിരാളി. 65 കിലോ ഫ്രീസ്റ്റൈൽ വിഭാഗത്തിൽ ആണ് ബജ്രംഗ് പൂനിയ മത്സരിക്കുവാനിറങ്ങിയത്.
ആദ്യ പിരീഡിൽ ഇന്ത്യന്‍ താരം 2-0ന് മുന്നിലായിരുന്നു. രണ്ടാം പിരീഡിൽ കൂടുതൽ ആധിപത്യത്തോടെ ബജ്രംഗ് കളത്തിലിറങ്ങിയപ്പോള്‍ ആറ് പോയിന്റും കൂടി നേടി 8-0ന്റെ വിജയം ആണ് ഇന്ത്യന്‍ താരം കരസ്ഥമാക്കിയത്.
ഹംഗറിയെ പരാജയപ്പെടുത്തി റഷ്യയുടെ റാഷിദോവ് ഗാദ്സിമുറാദ് ആയിരുന്നു മറ്റൊരു വെങ്കല മെഡൽ ജേതാവ്.
