അഞ്ചര മണിക്കൂർ നീണ്ട ഐതിഹാസിക പോരാട്ടത്തിനൊടുവിൽ അലക്സാണ്ടർ സ്വെരേവിനെ പരാജയപ്പെടുത്തി കാർലോസ് അൽകാരസ് 2026-ലെ ഓസ്ട്രേലിയൻ ഓപ്പൺ ഫൈനലിൽ പ്രവേശിച്ചു. മെൽബണിലെ റോഡ് ലാവർ അരീനയിൽ നടന്ന ആവേശകരമായ സെമിഫൈനലിൽ അഞ്ച് സെറ്റുകൾ നീണ്ട പോരാട്ടത്തിനൊടുവിലായിരുന്നു സ്പാനിഷ് താരത്തിന്റെ വിജയം. സ്കോർ: 6-4, 7-6, 6-7, 6-7, 7-5.
മത്സരത്തിന്റെ ഇടയ്ക്ക് പേശീവലിവും തളർച്ചയും അലട്ടിയെങ്കിലും, അസാമാന്യമായ മനക്കരുത്തോടെ പൊരുതിയ അൽകാരസ് ജർമ്മൻ താരത്തിന്റെ വെല്ലുവിളിയെ മറികടക്കുകയായിരുന്നു. ഒരു ഘട്ടത്തിൽ സെർവ് ചെയ്ത് മത്സരം സ്വന്തമാക്കാൻ സ്വെരേവിന് അവസരം ലഭിച്ചെങ്കിലും അത് തടഞ്ഞുകൊണ്ട് അൽകാരസ് നടത്തിയ തിരിച്ചുവരവ് ടെന്നീസ് ലോകത്തെ അമ്പരപ്പിച്ചു.
22-കാരനായ അൽകാരസിന്റെ കരിയറിലെ എട്ടാം ഗ്രാൻഡ്സ്ലാം ഫൈനലാണിത്. കൂടാതെ നാല് പ്രധാന ഗ്രാൻഡ്സ്ലാം ടൂർണമെന്റുകളുടെയും ഫൈനലിൽ എത്തുന്ന താരമെന്ന ബഹുമതിയും ഇതോടെ അദ്ദേഹം സ്വന്തമാക്കി. ഈ വർഷം കളിച്ച ആറ് മത്സരങ്ങളിലും വിജയിച്ചുകൊണ്ട് തന്റെ ജൈത്രയാത്ര തുടരുകയാണ് ഈ യുവതാരം. ടൂർണമെന്റിലുടനീളം മികച്ച പ്രകടനം പുറത്തെടുത്ത അൽകാരസ്, തന്റെ കരിയറിലെ ഏറ്റവും കഠിനമായ മത്സരങ്ങളിലൊന്നിനാണ് വെള്ളിയാഴ്ച മെൽബണിൽ സാക്ഷ്യം വഹിച്ചത്.
ഈ വിജയത്തോടെ ചരിത്രപരമായ നേട്ടത്തിനരികെയാണ് അൽകാരസ് എത്തിനിൽക്കുന്നത്. ഞായറാഴ്ച നടക്കുന്ന ഫൈനലിൽ വിജയിക്കുകയാണെങ്കിൽ കരിയർ ഗ്രാൻഡ്സ്ലാം (നാല് ഗ്രാൻഡ്സ്ലാമുകളും വിജയിക്കുക) പൂർത്തിയാക്കുന്ന ഏറ്റവും പ്രായം കുറഞ്ഞ താരമായി അൽകാരസ് മാറും.