എ.ടി.പി 500 മാസ്റ്റേഴ്സ് ആയ ബാഴ്സലോണ ഓപ്പൺ കിരീടം നിലനിർത്തി കാർലോസ് അൽകാരസ് ഗാർഫിയ. ഒന്നാം സീഡ് ആയ അൽകാരസ് രണ്ടാം സീഡ് ആയ സിറ്റിപ്പാസിനെ നേരിട്ടുള്ള സെറ്റുകൾക്ക് തോൽപ്പിച്ചു ആണ് കിരീടം നിലനിർത്തിയത്. ഫ്രഞ്ച് ഓപ്പണിന് മുമ്പ് അൽകാരസിന് മികച്ച ഊർജ്ജം ആവും ഈ ജയം നൽകുക.
ആദ്യ സെറ്റ് 6-3 നു നേടിയ സ്പാനിഷ് താരം രണ്ടാം സെറ്റ് 6-4 നു നേടി കിരീടം ഉറപ്പിക്കുക ആയിരുന്നു. മത്സരത്തിൽ 3 ഏസുകൾ ഉതിർത്ത അൽകാരസ് ഒരിക്കൽ ബ്രേക്ക് വഴങ്ങിയെങ്കിലും ഗ്രീക്ക് താരത്തിന്റെ സർവീസ് മൂന്നു തവണയാണ് ബ്രേക്ക് ചെയ്തത്. കരിയറിൽ ഇത് ആദ്യമായാണ് അൽകാരസ് ഒരു കിരീടം നിലനിർത്തുന്നത്, മാഡ്രിഡ് മാസ്റ്റേഴ്സ് കിരീടം നിലനിർത്തുക ആവും താരത്തിന്റെ അടുത്ത ലക്ഷ്യം.