പഹൽഗാമിലെ ഭീകരാക്രമണത്തെത്തുടർന്ന് ഇന്ത്യയിൽ പാകിസ്താൻ ആസ്ഥാനമായുള്ള മാധ്യമ പ്ലാറ്റ്ഫോമുകൾക്കെതിരെ സർക്കാർ ശക്തമായ നടപടി സ്വീകരിക്കുന്നതിൻ്റെ ഭാഗമായി മുൻ ക്രിക്കറ്റ് താരം ഷൊയ്ബ് അക്തറിൻ്റെ യൂട്യൂബ് ചാനൽ ഇന്ത്യയിൽ തടഞ്ഞു. ഡോൺ ന്യൂസ്, സമാ ടിവി, എആർവൈ ന്യൂസ്, ജിയോ ന്യൂസ് തുടങ്ങിയ പ്രമുഖ വാർത്താ ചാനലുകൾ ഉൾപ്പെടെ 16 പാകിസ്താൻ യൂട്യൂബ് ചാനലുകൾക്കും നിയന്ത്രണം ഏർപ്പെടുത്തിയിട്ടുണ്ട്.
ഈ ചാനലുകൾക്ക് മൊത്തത്തിൽ 63 ദശലക്ഷത്തിലധികം സബ്സ്ക്രൈബർമാരുണ്ടായിരുന്നു. ഇന്ത്യൻ ക്രിക്കറ്റ് ആരാധകർക്കിടയിൽ ഏറെ പ്രചാരമുള്ള ഷൊയ്ബ് അക്തറിൻ്റെ ചാനലും ഈ നടപടിയിൽ ഉൾപ്പെടുന്നു. ലഷ്കർ-ഇ-തൊയ്ബയുടെ പോഷക സംഘടനയായ റെസിസ്റ്റൻസ് ഫ്രണ്ട് നടത്തിയ ഭീകരാക്രമണത്തിൽ 26 വിനോദസഞ്ചാരികൾ ജമ്മു കശ്മീരിൽ കൊല്ലപ്പെട്ടതിനെത്തുടർന്ന് ഇന്ത്യയും പാകിസ്താനും തമ്മിലുള്ള സംഘർഷം വർധിച്ച സാഹചര്യത്തിലാണ് ഈ നടപടി.
അതേസമയം, ആക്രമണത്തിൻ്റെ പശ്ചാത്തലത്തിൽ പാകിസ്താനുമായി ഒരു ഉഭയകക്ഷി ക്രിക്കറ്റ് പരമ്പരയിലും ഇന്ത്യ ഏർപ്പെടില്ലെന്ന് ബിസിസിഐ വൈസ് പ്രസിഡൻ്റ് രാജീവ് ശുക്ല വ്യക്തമാക്കി. ഇരു രാജ്യങ്ങളും തമ്മിൽ 2013ലാണ് അവസാനമായി ഉഭയകക്ഷി പരമ്പര നടന്നത്. അതിനുശേഷം ഐസിസി ടൂർണമെൻ്റുകളിൽ മാത്രമാണ് ഇരു ടീമുകളും ഏറ്റുമുട്ടിയിട്ടുള്ളത്.