എ എഫ് സി കപ്പ് ഇന്റർ സോൺ സെമി ഫൈനലിൽ നാൾവ് ബെംഗളൂരു എഫ് സി ഇറങ്ങും. സ്പെയിനിലെ പ്രീസീസൺ ടൂറിന് ശേഷമാണ് ബെംഗളൂരു എഫ് സി എത്തുന്നത്. പുതിയ പരിശീലകനായ കാർലസിന്റെ കീഴിലെ ആദ്യ പരീക്ഷണം കൂടിയാകും നാളത്തെ മത്സരം. സെമി ഫൈനലിൽ തുർക്ക്മെനിസ്താൻ ക്ലബായ ആൽറ്റിൻ അസൈറിനെയാണ് ബെംഗളൂരു നേരിടുക. രണ്ട് പാദങ്ങളായി നടക്കുന്ന സെമി ഫൈനലിന്റെ ആദ്യ പാദമാണ് നഎ ബെംഗളൂരുവിന്റെ ഹോം ഗ്രൗണ്ടിൽ നടക്കുക. രണ്ടാം പാദം ഓഗസ്റ്റ് 29നാണ്.
ഐസോൾ എഫ് സി അടക്കമുള്ള ഗ്രൂപ്പിൽ നാടകീയമായ അവസാന മാച്ച് ഡേയിലാണ് ന്യൂ റാഡിയന്റിനെ പിന്തള്ളി ബെംഗളൂരു എഫ് സി ഇന്റർസോൺ സെമിക്ക് യോഗ്യത നേടിയിരുന്നത്. ഐസോൾ എഫ് സി ന്യൂ റാഡിയന്റിനെ അവസാന മത്സരത്തിൽ പരാജയപ്പെടുത്തിയത് ബെംഗളൂരു എഫ് സിയുടെ എഫ് സി കപ്പ് മുന്നോട്ടേക്കുള്ള യാത്രയ്ക്ക് സഹായകമാവുകയായിരുന്നു.
മുൻ കേരള ബ്ലാസ്റ്റേഴ്സ് താരം റിനോ ആന്റോയും യുവതാരം ലിയോൺ അഗസ്റ്റിനും മലയാളി സാന്നിദ്ധ്യങ്ങളായി ബെംഗളൂരു ടീമിൽ ഉണ്ട്. നാൾവ് രാത്രി 8 മണിക്കാണ് മത്സരം. തത്സമയം എ എഫ് സിയുടെ ഫേസ് ബുക്ക് പേജിൽ മത്സരം കാണാം.