ശ്രീലങ്കയ്ക്കായി ന്യൂസിലാണ്ടിനെതിരെ മികച്ച ബാറ്റിംഗ് പുലര്ത്തിയത് താനും കുശല് പെരേരയും മാത്രമെന്ന് പറഞ്ഞ് ശ്രീലങ്കന് നായകന് ദിമുത് കരുണാരത്നേ. ഇത്തരം സാഹചര്യങ്ങളില് 136 ഒരു സ്കോറെ അല്ലെന്ന് പറഞ്ഞ കരുണാരത്നേ തന്റെ ടീമിനു തിരിച്ചടിയായത് തുടര്ച്ചയായി വിക്കറ്റുകള് നഷ്ടമായതാണെന്നും വ്യക്തമാക്കി. കൂട്ടുകെട്ടുകള് ഇല്ലാത്തതാണ് ടീമിനു തിരിച്ചടിയായതെന്നും ശ്രീലങ്കന് നായകന് പറഞ്ഞു.
ക്രിക്കറ്റ് ആരാധകര് ആവേശകരമായ മത്സരം കാണുവാനാണ് സ്റ്റേഡിയത്തില് എത്തുന്നത്, അപ്പോള് ടീമില് നിന്ന് നിരാശാജനകമായ പ്രകടനം പുറത്ത് വരുന്നത് അവര്ക്കും തിരിച്ചടിയാണ്, അതിനാല് തന്നെ മെച്ചപ്പെട്ട് ബാറ്റിംഗ് വിക്കറ്റുകള് ആണ് ലോകകപ്പില് ആവശ്യമെന്നും ദിമുത് കരുണാരത്നേ പറഞ്ഞു. തങ്ങള് പ്രാക്ടീസ് മത്സരങ്ങളില് മികച്ച രീതിയിലാണ് ബാറ്റ് വീശിയതെന്നും ഇനിയുള്ള മത്സരങ്ങളില് ടീം മികച്ച വിക്കറ്റുകളാണ് പ്രതീക്ഷിക്കുന്നതെന്നും താരം പറഞ്ഞു.