ഐപിഎല് ആരംഭിയ്ക്കുന്നതിനു തൊട്ട് മുമ്പ് പരിക്ക് മൂലം കൊല്ക്കത്ത നൈറ്റ് റൈഡേഴ്സിനു വേണ്ടി കളിയ്ക്കുവാന് സാധിക്കാതിരുന്ന ദക്ഷിണാഫ്രിക്കന് താരം ആന്റിച്ച് നോര്ട്ജേയ്ക്ക് ലോകകപ്പും നഷ്ടമാകും. പോര്ട്ട് എലിസബത്തില് പരിശീലനത്തിനിടെ വലത് തള്ളവിരലിനേറ്റ പൊട്ടലാണ് താരത്തിനു തിരിച്ചടിയായത്. കുറഞ്ഞത് ആറ് മുതല് എട്ട് ആഴ്ച വരെ വിശ്രമമാണ് താരത്തിനു നിര്ദ്ദേശിച്ചിരിക്കുന്നത്. പകരം താരമായി ദക്ഷിണാഫ്രിക്ക ക്രിസ് മോറിസിനെ ലോകകപ്പ് ടീമില് ഉള്പ്പെടുത്തിയിട്ടുണ്ട്.
കഴിഞ്ഞ ദിവസമാണ് ആന്റിച്ചിനു പരിക്കേറ്റത്, ഉടനടി താരം അടിയന്തര ശസ്ത്രക്രിയയ്ക്ക് വിധേയനാകുകയായിരുന്നുവെന്നുമാണ് അറിയുവാന് കഴിഞ്ഞത്. 2018 ഫെബ്രുവരിയിലാണ് ക്രിസ് മോറിസ് അവസാനമായി ദക്ഷിണാഫ്രിക്കയ്ക്ക് വേണ്ടി കളിച്ചത്. ഐപിഎലില് ഡല്ഹി ക്യാപിറ്റല്സിനു വേണ്ടി കളിച്ച താരത്തിനു മോശം സീസണായിരുന്നു ഇത്തവണത്തേത്.