ടി20 ലോകകപ്പ് സൂപ്പർ 8 മത്സരത്തിൽ ഇന്ന് ഓസ്ട്രേലിയ ബംഗ്ലാദേശിനെ തോൽപ്പിച്ചു. ബംഗ്ലാദേശ് ഉയർത്തിയ 141 എന്ന വിജയലക്ഷ്യം പിന്തുടർന്ന ഓസ്ട്രേലിയക്ക് മഴ തടസ്സമായി എത്തി എങ്കിലും വിജയം നേടാൻ അവർക്ക് ആയി. 11 ഓവറിൽ 101-2 എന്ന നിലയിൽ ഇരിക്കെ ആയിരുന്നു മഴ വന്നത്. അവർ അപ്പോൾ ഡെക്വർത്ത് ലൂയിസ് പ്രകാരം 28 റൺസിന് മുന്നിലായിരുന്നു ഓസ്ട്രേലിയ. ഇതോടെ അവർ ജയം ഉറപ്പിച്ചു.
ഓസ്ട്രേലിയക്ക് ആയി ഡേവിഡ് വാർണർ 35 പന്തിൽ 53 റൺസുമായി പുറത്താകാതെ നിന്നു. ട്രാവിസ് ഹെഡ് 31 റൺസും എടുത്തു.
ഇന്ന് ആദ്യം ബാറ്റു ചെയ്ത ബംഗ്ലാദേശ് 140 റൺസിൽ ഒതുങ്ങി. 20 ഓവറിൽ 8 വിക്കറ്റ് നഷ്ടത്തിൽ ആണ് ബംഗ്ലാദേശ് 140 റൺസ് എടുത്തത്. 41 റൺസ് എടുത്ത ഷാന്റോയും 40 റൺസ് എടുത്ത തൗഹീദ് ഹൃദോയിയും മാത്രമാണ് ബംഗ്ലാദേശ് ബാറ്റിങ് നിരയിൽ തിളങ്ങിയത്.
ഓസ്ട്രേലിയക്ക് ആയി ഇന്ന് പാറ്റ് കമ്മിൻസ് ഹാട്രിക്ക് നേടി. മഹ്മുദുള്ള, മെഹ്ദി ഹസൻ, തൗഹിദ് ഹൃദോയ് എന്നിവരെ പുറത്താക്കിയാണ് കമ്മിൻസ് ഹാട്രിക്ക് നേടിയത്. കമ്മിൻസ് ആകെ 3 വിക്കറ്റ് നേടിയപ്പോൾ സാമ്പ 2 വിക്കറ്റും സ്റ്റാർക്ക്, സ്റ്റോയിനിസ്, മാക്സ്വെൽ എന്നിവർ ഒരോ വിക്കറ്റ് വീതവും നേടി.