ഐസിസി പുരുഷ ക്രിക്കറ്റ് ലോകകപ്പിൽ പാകിസ്താൻ അധികം മുന്നോട്ട് പോകുന്നത് താൻ കാണുന്നില്ലെന്ന് മുൻ ഇന്ത്യൻ സ്പിന്നർ ഹർഭജൻ സിംഗ്. പാകിസ്താൻ ശക്തമായ ടീമായി തനിക്ക് തോന്നുന്നില്ല എന്നും അവർ സെമിയിലേക്കെത്തില്ല എന്നും ഹർഭജൻ സിംഗ്.
“പാകിസ്താൻ അത്ര ദൂരം പോകുന്നത് ഞാൻ കാണുന്നില്ല. മുന്നിൽ എത്താൻ പോകുന്ന ആദ്യ മൂന്ന് ടീമുകൾ എനിക്ക് ഉറപ്പാണ്- ഇംഗ്ലണ്ട്, ഇന്ത്യ, ഓസ്ട്രേലിയ. ന്യൂസിലൻഡോ ദക്ഷിണാഫ്രിക്കയോ ആകും നാലാമത്തെ ടീം. നാലാമത്തെ ടീമായി ഞാൻ പാക്കിസ്ഥാനെ തിരഞ്ഞെടുക്കുന്നില്ല,” ഹർഭജൻ പറഞ്ഞു.
“അവരുടെ സ്പിൻ പഴയത് പോലെ ശക്തമല്ലെന്നും അവരുടെ ബാറ്റിംഗ് വളരെ ദുർബലമാണെന്നും ഞാൻ വിശ്വസിക്കുന്നു. സത്യം പറഞ്ഞാൽ, പന്ത് സ്വിംഗ് ചെയ്യുമ്പോൾ അവർ പതറുകയാണ്. അവർക്ക് ബാറ്റ് ചെയ്യാൻ ആയി ഫ്ലാറ്റ് ട്രാക്കുകൾ ലഭിക്കില്ല. ഒരുപക്ഷേ രണ്ട് വേദികളിൽ മാത്രം അങ്ങനെയുള്ള പിച്ച് കിട്ടും” ഹർഭജൻ കൂട്ടിച്ചേർത്തു.
ഇന്ന് ഹൈദരാബാദിലെ രാജീവ് ഗാന്ധി ഇന്റർനാഷണൽ സ്റ്റേഡിയത്തിൽ പാകിസ്ഥാൻ അവരുടെ ലോകകപ്പ് 2023 ഉദ്ഘാടന മത്സരത്തിൽ നെതർലാൻഡിനെ നേരിടാൻ ഇരിക്കുകയാണ്.