ഐസിസി ഏകദിന ക്രിക്കറ്റ് ലോകകപ്പിൽ ഇന്ന് രണ്ട് ഏഷ്യൻ ശക്തികളുടെ പോരാട്ടമാണ്. ഇന്ന് ഉച്ചക്ക് 2 മണിക്ക് നടക്കുന്ന മത്സരത്തിൽ പാകിസ്താൻ ശ്രീലങ്കയെ നേരിടും. ഹൈദരാബാദിലെ രാജീവ് ഗാന്ധി ഇന്റർനാഷണൽ സ്റ്റേഡിയത്തിൽ ആണ് പോരാട്ടം. ഇതേ വേദിയിൽ നെതർലാൻഡിനെതിരെ 81 റൺസിന്റെ വിജയം നേടി ആണ് ബാബർ അസമിന്റെ ടീം ലോകകപ്പ് തുടങ്ങിയത്.
ശ്രീലങ്കയ്ക്ക് എന്നാൽ പരാജയത്തോടെ ആണ് ലോകകപ്പ് തുടങ്ങാൻ ആയത്. അവർ ആദ്യ മത്സരത്തിൽ ദക്ഷിണാഫ്രിക്കയോട് പരാജയപ്പെട്ടിരുന്നു. സ്റ്റാർ സ്പിന്നർ മഹേഷ് തീക്ഷണയുടെ തിരിച്ചുവരവ് ഇന്ന് ശ്രീലങ്കയ്ക്ക് ഊർജ്ജം നൽകും. ഏഷ്യാ കപ്പിൽ പാക്കിസ്ഥാനെതിരായ ശ്രീലങ്കയുടെ സൂപ്പർ ഫോർ മത്സരത്തിനിടെ ആയിരുന്നു തീക്ഷണയ്ക്ക് പരിക്കേറ്റത്.
ഇന്ന് നടക്കുന്ന മറ്റൊരു മത്സരത്തിൽ ഇംഗ്ലണ്ട് ബംഗ്ലാദേശിനെ നേരിടും. ധരംശാലയിൽ നടക്കുന്ന മത്സരം രാവിലെ 10.30ന് ആണ് ആരംഭിക്കുക.