Category: World Cup

പാകിസ്ഥാനെതിരെയുള്ള സൂപ്പർ ലോകകപ്പ് പോരാട്ടത്തിന് മുൻപ് ഇന്ത്യൻ ടീമിന് മുന്നറിയിപ്പുമായി മുൻ ഇന്ത്യൻ ക്യാപ്റ്റൻ സൗരവ് ഗാംഗുലി. മത്സരത്തിൽ ഇന്ത്യക്കാണ് ജയാ സാധ്യത കൂടുതൽ എന്ന് ഇന്ത്യൻ താരങ്ങൾ കരുതരുതെന്ന് സൗരവ് ഗാംഗുലി ഇന്ത്യൻ താരങ്ങൾക്ക് മുന്നറിയിപ്പ് നൽകി. മാഞ്ചസ്റ്ററിൽ വെച്ചാണ് ഈ ലോകകപ്പിലെ പ്രധാന മത്സരങ്ങളിൽ ഒന്നായ ഇന്ത്യ – പാകിസ്ഥാൻ പോരാട്ടം.

2017ൽ നടന്ന ചാമ്പ്യൻസ് ലീഗ് ഫൈനലിൽ ഇന്ത്യൻ താരങ്ങൾ മത്സരത്തെ ലളിതമായി കണ്ടത്കൊണ്ടാണ് ഇന്ത്യ അന്ന് പരാജയപെട്ടതെന്നും സൗരവ് ഗാംഗുലി പറഞ്ഞു. പാകിസ്ഥാൻ ഫാസ്റ്റ് ബൗളർ മുഹമ്മദ് ആമിറിനെതിരെ ഇന്ത്യൻ താരങ്ങൾ എങ്ങനെ കളിക്കുന്നതു എന്നത് ഇന്നത്തെ മത്സരത്തിന് വളരെ പ്രധാനപെട്ടതാണെന്നും ഗാംഗുലി പറഞ്ഞു. ലോകകപ്പിൽ ഇതുവരെ 6 തവണ പരസ്പരം ഏറ്റുമുട്ടിയപ്പോഴും പാകിസ്ഥാന് ഇന്ത്യയെ ഇതുവരെ തോൽപ്പിക്കാനായിട്ടില്ല. അവസാനമായി 2015ൽ നടന്ന ലോകകപ്പിൽ 76 റൺസിനാണ് ഇന്ത്യ പാകിസ്ഥാനെ തോൽപ്പിച്ചത്.

അഫ്ഗാനിസ്ഥാന്റെ തോല്‍വിയ്ക്ക് കാരണം ദുര്‍വിധിയെന്ന് പറഞ്ഞ് നായകന്‍ ഗുല്‍ബാദിന്‍ നൈബ്. കഴിഞ്ഞ മത്സരത്തിലെ പോലെ ഓപ്പണര്‍മാര്‍ മികച്ച തുടക്കമാണ് നല്‍കിയതെങ്കിലും ആ മത്സരത്തിലെതിനു സമാനമായ തകര്‍ച്ചയാണ് ദക്ഷിണാഫ്രിക്കയ്ക്കെതിരെയും നേരിട്ടതെന്ന് നൈബ് പറഞ്ഞു. താഹിറിന്റെ സ്പെല്ലിനാണ് മുഴുവന്‍ ഖ്യാതിയും നല്‍കേണ്ടത്, അത് അവിശ്വസനീയമായിരുന്നുവെന്നും നൈബ് പറഞ്ഞു.

ഓപ്പണര്‍മാര്‍ ഫാസ്റ്റ് ബൗളര്‍മാര്‍ക്കെതിരെ മികച്ച രീതിയില്‍ തുടങ്ങിയെങ്കിലും മധ്യ ഓവറുകളില്‍ ടീം മത്സരം കൈവിടുകയാണ്. കൂട്ടുകെട്ടുകള്‍ പടുത്തുയര്‍ത്തി കൂറച്ച് കൂടി ഉത്തരവാദിത്വത്തോടെയുള്ള സമീപനം ടീമില്‍ നിന്നുണ്ടാകണമെന്ന് നൈബ് വ്യക്തമാക്കി. റഷീദ് ഖാന്‍ ബാറ്റിംഗ് ഓര്‍ഡറില്‍ 9ാമനായി വരുമ്പോള്‍ തന്നെ അഫ്ഗാനിസ്ഥാന്റെ ബാറ്റിംഗിന്റെ ആഴം മനസ്സിലാക്കാവുന്നതാണ്. എന്നാല്‍ ബാറ്റ്സ്മാന്മാര്‍ ആരും തന്നെ യാതൊരുവിധ ഉത്തരവാദിത്വം ഏറ്റെടുക്കുന്നില്ലെന്ന് നൈബ് പറഞ്ഞു.

ഇന്ത്യക്ക് പോന്ന എതിരാളികളല്ല പാകിസ്താൻ എന്ന് മുൻ ഇന്ത്യൻ താരം വിരേന്ദർ സേവാംഗ്. ലോകകപ്പിൽ ഇന്നാണ് ഇന്ത്യ – പാക്കിസ്ഥാൻ സൂപ്പർ പോരാട്ടം നടക്കുന്നത്.

ഏകദിന ക്രിക്കറ്റ് ചരിത്രത്തിൽ പ്രത്യേക സ്ഥാനമാണ് ഇന്ത്യ- പാക്കിസ്താൻ മാച്ചുകൾക്കുള്ളത്. കളത്തിന് പുറത്തുള്ള പോലെ തന്നെ കളത്തിനകത്തും വാശിയേറിയതാണ് ഇന്ത്യ- പാക്കിസ്ഥാൻ മത്സരങ്ങൾ. എന്നാൽ അടുത്ത കാലത്തായി ഏകപക്ഷീയമാണ് മത്സരങ്ങൾ എന്നും ഇന്ത്യക്ക് മുന്നിൽ പാക്കിസ്ഥാൻ പഴയപോലെ ശക്തരല്ലെന്നും വീരു പറയുന്നു.

ക്രിക്കറ്റ് ലോകകപ്പിലെ ഇന്ത്യ – പാകിസ്ഥാൻ ചരിത്രമെടുത്താൽ ഒരു തവണ പോലും ഇന്ത്യയെ തോൽപ്പിക്കാൻ പാകിസ്ഥാനായിട്ടില്ല. ഇന്ത്യയുമായി 6 തവണ ലോകകപ്പിൽ ഏറ്റുമുട്ടിയപ്പോൾ ആറു തവണയും ജയിച്ചത് ഇന്ത്യ തന്നെ ആയിരുന്നു. ഇന്ന് മാഞ്ചസ്റ്ററിൽ നടക്കുന്നത് ഇന്ത്യയും പാകിസ്ഥാനും തമ്മിലുള്ള ഏഴാമത്തെ ലോകകപ്പ് പോരാട്ടമാണ്.

ഇന്ത്യയും പാക്കിസ്ഥാനും ആദ്യമായി ലോകകപ്പിൽ ഏറ്റുമുട്ടിയത് 1992 ലോകകപ്പിലാണ്. അന്ന് സിഡ്‌നിയിൽ നടന്ന മത്സരത്തിൽ ഇന്ത്യ 43 റൺസിനാണ് ജയിച്ചത്. ആദ്യം ബാറ്റ് ചെയ്ത ഇന്ത്യ നേടിയ 216 റൺസിന്‌ മറുപടിയായി 173 റൺസ് പാകിസ്ഥാനായുള്ളു.  ഇന്ത്യൻ നിരയിൽ 54 റൺസ് എടുത്ത സച്ചിനും 46 റൺസ് എടുത്ത ജഡേജയുമാണ് തിളങ്ങിയത്. രണ്ടു വിക്കറ്റ് വീതം വീഴ്ത്തിയ പ്രഭാകറും കപിൽ ദേവും ബൗളിങ്ങിൽ തിളങ്ങി. പാകിസ്ഥാൻ ബാറ്റ്സ്മാൻ ജാവേദ് മിയാൻദാദും തമ്മിൽ നടന്ന തർക്കവും ഈ മത്സരത്തെ വ്യസ്ഥമാക്കി.

തുടർന്ന് 1996ൽ ഇന്ത്യയിൽ നടന്ന ലോകകപ്പിലാണ് ഇന്ത്യ പാകിസ്ഥാനെ നേരിട്ടത്. ബാംഗ്ലൂരിൽ നടന്ന മത്സരത്തിൽ 39 റൺസിനായിരുന്നു ഇന്ത്യയുടെ ജയം. ആദ്യം ബാറ്റ് ചെയ്ത ഇന്ത്യ 287 റൺസ് എടുക്കുകയും തുടർന്ന് ബാറ്റ് ചെയ്ത പാകിസ്ഥാൻ 248 റൺസിൽ ഇന്നിംഗ്സ് അവസാനിപ്പിക്കുകയായിരുന്നു.  ഇന്ത്യൻ നിരയിൽ 93 റൺസ് എടുത്ത നവജ്യോത് സിങ് സിധുവിന്റെ പ്രകടനവും വെടിക്കെട്ട് പ്രകടനം നടത്തി 45 റൺസ് എടുത്ത അജയ് ജഡേജയുടെ പ്രകടനമാണ് ഇന്ത്യൻ സ്കോർ ഉയർത്തിയത്. ഇന്ത്യക്ക് വേണ്ടി വെങ്കടേഷ് പ്രസാദും കുംബ്ലെയും മൂന്ന് വിക്കറ്റ് വീതം വീഴ്ത്തി. ഈ മത്സരത്തിലാണ് ആമിർ സുഹൈലും വെങ്കടേഷ് പ്രസാദും തമ്മിൽ ഗ്രൗണ്ടിൽ വാക്കു തർക്കം നടന്നത്.

ഇന്ത്യയും പാകിസ്ഥാനും തമ്മിൽ ലോകകപ്പിലെ മൂന്നാമത്തെ പോരാട്ടം നടന്നത് ഇന്ന് മത്സരം നടക്കുന്ന മാഞ്ചസ്റ്ററിലെ ഗ്രൗണ്ടിൽ ആയിരുന്നു. 1999ലെ ലോകകപ്പിൽ ഇന്ത്യ 47 റൺസിനാണ് പാകിസ്ഥാനെ തോൽപ്പിച്ചത്.  ആദ്യ ബാറ്റ് ചെയ്ത ഇന്ത്യ താരതമ്യേന കുറവായ 227 റൺസ് മാത്രമാണ് എടുത്തത്. എന്നാൽ അഞ്ച് വിക്കറ്റ് വീഴ്ത്തിയ വെങ്കടേഷ് പ്രസാദിന്റെ ബൗളിന്റെ പിൻബലത്തിൽ ഇന്ത്യ പാക്കിസ്ഥാനെ 180 റൺസിൽ ഓൾ ഔട്ട് ആക്കുകയായിരുന്നു. ഇന്ത്യൻ ബാറ്റ്സ്മാൻമാരിൽ 61 റൺസ് എടുത്ത രാഹുൽ ദ്രാവിഡും 59 റൺസ് എടുത്ത അസ്ഹറുദീനുമാണ് തിളങ്ങിയത്. ബൗളർമാരിൽ അഞ്ച് വിക്കറ്റ് വീഴ്ത്തിയ വെങ്കടേഷ് പ്രസാദിനെ പുറമെ ശ്രീനാഥ് മൂന്ന് വിക്കറ്റ് വീഴ്ത്തി.

2003ൽ സൗത്ത് ആഫ്രിക്കയിൽ നടന്ന ലോകകപ്പിലാണ് ഇന്ത്യ പാകിസ്ഥാനെ നാലാമതായി തോൽപ്പിച്ചത്.  അന്ന് 6 വിക്കറ്റിനാണ് ഇന്ത്യ പാകിസ്ഥാനെ തോൽപ്പിച്ചത്. ആദ്യം ബാറ്റ് ചെയ്ത പാകിസ്ഥാൻ 273 റൺസ് എടുത്തപ്പോൾ ഇന്ത്യ നാല് വിക്കറ്റ് നഷ്ടത്തിൽ മറികടക്കുകയായിരുന്നു. ഇന്ത്യക്ക് വേണ്ടി സച്ചിൻ 98 റൺസ് എടുത്തപ്പോൾ 50 റൺസ് എടുത്ത യുവരാജ് സിങ്ങും 44 റൺസ് എടുത്ത ദ്രാവിഡും സച്ചിന് മികച്ച പിന്തുണ നൽകി.

2011ൽ ഇന്ത്യ  കിരീടം നേടിയ ലോകകപ്പിലും ഇന്ത്യ പാകിസ്ഥാനെ തോൽപ്പിച്ചിരുന്നു. 29 റൺസിനാണ് ഇന്ത്യ പാകിസ്താനെ തോൽപ്പിച്ചത്.  ആദ്യം ബാറ്റ് ചെയ്ത ഇന്ത്യ സച്ചിൻ ടെണ്ടുൽക്കറുടെ 85 റൺസ് പ്രകടനത്തിന്റെ പിൻബലത്തിൽ 260 റൺസ് എടുക്കുകയായിരുന്നു. തുടർന്ന് ബാറ്റ് ചെയ്ത പാകിസ്ഥാൻ 231 റൺസിന്‌ എല്ലാവരും ഓൾ ഔട്ട് ആവുകയായിരുന്നു. ബൗളർമാരിൽ രണ്ടു വിക്കറ്റ് വീതം വീഴ്ത്തിയ നെഹ്‌റയും ഹർഭജൻ സിംഗുമാണ് തിളങ്ങിയത്.

2015ൽ നടന്ന അവസാന ലോകകപ്പിലും ഇന്ത്യ പാകിസ്ഥാനെ തോൽപ്പിച്ചിരുന്നു. ഓസ്ട്രേലിയയിൽ നടന്ന ലോകകപ്പിൽ 76 റൺസിനാണ് ഇന്ത്യ പാകിസ്ഥാനെ തോൽപ്പിച്ചത്. സെഞ്ചുറി നേടിയ വിരാട് കോഹ്‌ലിയുടെ പ്രകടനത്തിന്റെ പിൻബലത്തിൽ ഇന്ത്യ 300 റൺസ് എടുക്കുകയായിരുന്നു. തുടർന്ന് ബാറ്റ് ചെയ്ത പാകിസ്ഥാൻ 224 റൺസിന്‌ ഓൾ ഔട്ട് ആവുകയായിരുന്നു. കോഹ്‌ലി 107 റൺസ് എടുത്തപ്പോൾ ബൗളർമാരിൽ 4 വിക്കറ്റ് വീതം വീഴ്ത്തിയ ഷമിയാണ് തിളങ്ങിയത്.

അതെ സമയം  ഇന്ത്യയും പാകിസ്ഥാനും അവസാനമായി ഇംഗ്ലണ്ടിൽ വെച്ച് ഏറ്റുമുട്ടിയപ്പോൾ ജയം പാകിസ്ഥാനെ കൂടെയായിരുന്നു. 2017ൽ ചാമ്പ്യൻസ് ലീഗ് ഫൈനലിൽ ഇംഗ്ലണ്ടിൽ വെച്ച് ഏറ്റുമുട്ടിയപ്പോയാണ് പാകിസ്ഥാൻ ഇന്ത്യയെ തോൽപ്പിച്ചത്.

ഇന്ത്യൻ ടീമിൽ ഏറ്റവും സാങ്കേതിക മികവുള്ള താരം കെ.എൽ രാഹുൽ ആണെന്ന് വെസ്റ്റിൻഡീസ് ക്രിക്കറ്റ് ഇതിഹാസം ബ്രയാൻ ലാറ. കഴിഞ്ഞ ദിവസം പരിക്കേറ്റ ശിഖർ ധവാന് പകരം കെ.എൽ രാഹുൽ പാകിസ്ഥാനെതിരെ ഓപ്പണിങ് സ്ഥാനത്ത് ഇറങ്ങുമെന്നാണ് കരുതപ്പെടുന്നത്. നാലാം സ്ഥാനത്ത് രാഹുൽ മികച്ച പ്രകടനം പുറത്തെടുക്കുമെന്നും മുൻ നിര ബാറ്റ്സ്മാൻമാർ പരാജയപ്പെട്ടാലും രാഹുലിന് ആ തകർച്ചയെ മറികടക്കാനുള്ള കഴിവുണ്ടെന്നും ലാറ പറഞ്ഞു.

പരിക്കേറ്റ ശിഖർ ധവാൻ ടീമിൽ ഉണ്ടായിരുന്നെങ്കിൽ നാലാം സ്ഥാനത്ത് കെ.എൽ രാഹുലിന്റെ സേവനം ഇന്ത്യക്ക് ലഭിക്കുമായിരുന്നെന്നും ലാറ പറഞ്ഞു. ഇന്ത്യൻ ബാറ്റിംഗ് നിരയിൽ എതിരാളികൾക്ക് ഒരു കുറവ് കണ്ടെത്താൻ കഴിയില്ലെന്നും ലാറ പറഞ്ഞു. ഇന്ത്യൻ ബാറ്റിംഗ് നിരയിൽ ഏഴാം സ്ഥാനത്ത് വരെ മികച്ച ബാറ്റ്സ്മാൻമാർ ആണെന്നും ബാറ്റ്സ്മാൻമാർ ഫോം കണ്ടെത്തിയില്ലെങ്കിലും ഏതൊരു ചെറിയ സ്കോറും പ്രതിരോധിക്കാൻ ഇന്ത്യൻ ബൗളർമാർക്ക് കഴിയുമെന്നും ലാറ പറഞ്ഞു.