ഇന്ത്യൻ ക്രിക്കറ്റ് ടീമിന് ആശംസകളുമായി തോമസ് മുള്ളർ

നവംബർ 15 ന് മുംബൈയിൽ നടക്കാനിരിക്കുന്ന ന്യൂസിലൻഡിനെതിരായ ലോകകപ്പ് 2023 സെമിഫൈനൽ മത്സരത്തിന് മുന്നോടിയായി ഇന്ത്യൻ ടീമിന് ആശംസ നേർന്ന് ജർമ്മൻ ഫുട്ബോൾ താരം തോമസ് മുള്ളർ. ഇന്ത്യൻ ടീമിന് പിന്തുണ അറിയിച്ചു ഇന്ത്യയുടെ ജേഴ്സി അണിഞ്ഞ് പോസ്റ്റ് ചെയ്ത വീഡിയോയിൽ ആണ് വിരാട് കോഹ്‌ലിക്കും ഇന്ത്യക്കും മുള്ളർ ആശംസ അറിയിച്ചത്.

ബയേൺ മ്യൂണിക് താരം തന്റെ എക്‌സ് അക്കൗണ്ടിൽ പങ്കിട്ട ഒരു വീഡിയോയിൽ ആണ് ഇന്ത്യൻ ടീം ജേഴ്സി അണിഞ്ഞത്. ഇതാദ്യമായല്ല തോമസ് മുള്ളർ ലോകകപ്പിൽ ഇന്ത്യൻ പുരുഷ ക്രിക്കറ്റ് ടീമിനെ പിന്തുണയ്ക്കുന്നത്. 2019 ലോകകപ്പിന്റെ സമയത്തും അദ്ദേഹം പിന്തുണയുമായി എത്തിയിരുന്നു.

ജർമ്മൻ ദേശീയ ടീമിനൊപ്പം ലോക കിരീടം നേടിയിട്ടുള്ള താരമാണ് മുള്ളർ. 125 മത്സരങ്ങൾ രാജ്യത്തിനായി കളിച്ചിട്ടുണ്ട്. ബയേൺ മ്യൂണിക്കിന്റെ ഇതിഹാസ താരവുമാണ്.