തന്റെ പാക്കിസ്ഥാനെതിരെയുള്ള ലോകകപ്പ് അരങ്ങേറ്റം വളരെ പ്രത്യേകത നിറഞ്ഞതാണെന്നും ആദ്യ പന്തില് തന്നെ വിക്കറ്റ് നേടാനായത് തന്റെ ആത്മവിശ്വാസത്തെ ഏറെ ഉയര്ത്തിയെന്നും പറഞ്ഞ് ഇന്ത്യയുടെ ഓള്റൗണ്ടര് വിജയ് ശങ്കര്. സമ്മര്ദ്ദത്തിലാണ് താന് മത്സരത്തിനെത്തിയത്, ലോകകപ്പിലെ ആദ്യ മത്സരം, അതും പാക്കിസ്ഥാനെതിരെ, തീര്ച്ചയായും സമ്മര്ദ്ദം നിറഞ്ഞ മത്സരമായിരുന്നു തനിക്ക് അത്, ടീം മത്സരത്തില് ജയിച്ചപ്പോള് കൂടുതല് സന്തോഷവുമായിയെന്ന് വിജയ് ശങ്കര് പറഞ്ഞു.
അഫ്ഗാനിസ്ഥാനെതിരെയുള്ള മത്സരത്തിന് തൊട്ട് മുമ്പ് വിജയ് ശങ്കറും ഭുവനേശ്വര് കുമാറും ഫിറ്റ്നെസ്സ് ടെസ്റ്റിനായി എത്തിയിരുന്നു. ഭുവി പാക്കിസ്ഥാനെതിരെയുള്ള മത്സരത്തിലാണ് പരിക്കേറ്റ് പുറത്ത് പോയതെങ്കില് വിജയ് ശങ്കര്ക്ക് നെറ്റ്സില് ജസ്പ്രീത് ബുംറയുടെ പന്ത് കാല്പാദത്തില് കൊണ്ടതിനാല് വന്ന പരിക്കാണ് പ്രശ്നമായത്.
എന്നാല് താന് ഏറെ മെച്ചപ്പെട്ടുവെന്നും കളിക്കാനാകുമെന്നുമാണ് താരം പ്രത്യാശ പ്രകടിപ്പിച്ചത്. നെറ്റ്സില് ബുംറയ്ക്കെതിരെ ബാറ്റ് ചെയ്യുമ്പോള് ഇത്തരം പരിക്കുകള് പ്രതീക്ഷിച്ചാണ് ഏവരും കളിക്കുന്നതെന്നും വിജയ് ശങ്കര് കൂട്ടിചേര്ത്തു.