അഫ്ഗാനിസ്ഥാന്‍ ആദ്യം സമ്മര്‍ദ്ദത്തിലാക്കി, എന്നാല്‍ ഞങ്ങള്‍ മികച്ച തിരിച്ചവരവ് നടത്തി

Sayooj

Download the Fanport app now!
Appstore Badge
Google Play Badge 1

അഫ്ഗാനിസ്ഥാനെതിരെ 7 വിക്കറ്റ് വിജയം അനായാസമായാണ് ന്യൂസിലാണ്ട് സ്വന്തമാക്കിയത്. 173 റണ്‍സെന്ന വിജയ ലക്ഷ്യം 32.1 ഓവറിലാണ് 3 വിക്കറ്റ് നഷ്ടത്തില്‍ ന്യൂസിലാണ്ട് മറികടന്നത്. കെയിന്‍ വില്യംസണ്‍ 79 റണ്‍സുമായി പുറത്താകാതെ നിന്നും റോസ് ടെയിലറുടെ 48 റണ്‍സുമാണ് ബാറ്റിംഗില്‍ തിളങ്ങിയതെങ്കിലും ന്യൂസിലാണ്ട് ബൗളര്‍മാരാണ് ഈ വിജയത്തിനു വഴിയൊരുക്കിയത്.

ജെയിംസ് നീഷം 5 വിക്കറ്റ് നേടി അഫ്ഗാനിസ്ഥാന് തുടക്കത്തില്‍ പ്രഹരം ഏല്പിച്ചപ്പോള്‍ വാലറ്റത്തിന്റെ കഥ കഴിച്ചത് ലോക്കി ഫെര്‍ഗൂസണ്‍ ആണ്. ഈ പ്രകടനത്തിനു ജെയിംസ് നീഷം ആണ് കളിയിലെ താരമായി തിരഞ്ഞെടുക്കപ്പെട്ടത്. അഫ്ഗാനിസ്ഥാന്‍ തുടക്കത്തില്‍ തങ്ങളെ സമ്മര്‍ദ്ദത്തിലാക്കി എന്നാണ് ജെയിംസ് നീഷം വെളിപ്പെടുത്തിയത്. ന്യൂ ബോള്‍ ബൗളര്‍മാര്‍ക്ക് യാതൊരു വിധം പ്രഭാവവും സൃഷ്ടിക്കാനാകാതെ പോയപ്പോള്‍ അഫ്ഗാനിസ്ഥാന്‍ 66 റണ്‍സിലേക്ക് വിക്കറ്റ് നഷ്ടമില്ലാതെ നീങ്ങിയെങ്കിലും പിന്നീട് അതേ സ്കോറില്‍ മൂന്ന് വിക്കറ്റുകളാണ് ടീമിനു നഷ്ടമായത്.

മികച്ച തുടക്കത്തിനു ശേഷം അവരെ പ്രതിരോധത്തിലാക്കുവാന്‍ തങ്ങള്‍ക്ക് സാധിച്ചുവെന്നും ന്യൂസിലാണ്ടിലെ പിച്ചുകളെക്കാള്‍ ബൗണ്‍സ് ഇവിടെ ലഭിച്ചത് തനിക്ക് ഗുണം ചെയ്തുവെന്നാണ് ജെയിംസ് നീഷം പറഞ്ഞത്. താന്‍ പന്ത് അധികം സ്വിംഗ് ചെയ്യാന്‍ ഉദ്ദേശിക്കുന്നില്ലെന്നും ബൗണ്‍സ് കണ്ടെത്തുവാന്‍ മാത്രമാണ് ശ്രദ്ധിക്കുന്നതെന്നും ജെയിംസ് നീഷം പറഞ്ഞു.