സ്മിത്തിനെ കള്ളനെന്ന് വിളിച്ച് ഇന്ത്യന്‍ ആരാധകര്‍, ആ വിളി നിര്‍ത്തൂവെന്ന് ആവശ്യപ്പെട്ട് കോഹ്‍ലി

ഇന്ത്യന്‍ ഇന്നിംഗ്സിന്റെ അവസാന ഓവറുകളില്‍ ഹാര്‍ദ്ദിക് പാണ്ഡ്യയും വിരാട് കോഹ്‍ലിയും അടിച്ച് തകര്‍ക്കുമ്പോള്‍ ഗ്രൗണ്ടിലേ തേര്‍ഡ് മാനില്‍ ഫീല്‍ഡ് ചെയ്യുകയായിരുന്നു സ്റ്റീവ് സ്മിത്തിനെതിരെ ചില ഇന്ത്യന്‍ ആരാധകരുടെ കള്ളനെന്ന വിളികള്‍ ഉയര്‍ന്നിരുന്നു. ഹാര്‍ദ്ദിക് പുറത്തായ ആ ഇടവേളയില്‍ അത് നിര്‍ത്തുവാന്‍ ആവശ്യപ്പെട്ട് പകരം വേണമെങ്കില്‍ തനിക്ക് വേണ്ടി ചിയര്‍ ചെയ്യുവാന്‍ കോഹ്‍ലി ആവശ്യപ്പെടുകയായിരുന്നു.

ഇത് കേട്ട ഇന്ത്യന്‍ ആരാധകര്‍ സ്മിത്തിനെതിരെയുള്ള കളിയാക്കല്‍ നിര്‍ത്തുകയായിരുന്നു. കേപ് ടൗണിലെ പന്ത് ചുരണ്ടല്‍ വിവാദത്തിനെത്തുടര്‍ന്ന വിലക്ക് നേരിട്ട സ്റ്റീവ് സ്മിത്തിനെയും ഡേവിഡ് വാര്‍ണറെയും ഇംഗ്ലണ്ടിലെ ആരാധകര്‍ കൂകിവിളികളിലൂടെയാണ് സ്വാഗതം ചെയ്തത്. ഇപ്പോള്‍ ഇന്ത്യന്‍ ആരാധകരും സമാനമായ രീതി അവലംബിക്കുന്ന കാഴ്ചയാണ് കാണുന്നത്.