ലുംഗിസാനി എന്‍ഗിഡി പരിക്കേറ്റ് ഇന്ത്യയ്ക്കെതിരെ കളിയ്ക്കുന്ന കാര്യം സംശയത്തിലാണെങ്കിലും ദക്ഷിണാഫ്രിക്കയ്ക്ക് വെറ്ററന്‍ താരം ഡെയില്‍ സ്റ്റെയിനിന്റെ സേവനം ലഭിച്ചേക്കുമെന്ന സൂചന നല്‍കി നായകന്‍ ഫാഫ് ഡു പ്ലെസി. സ്റ്റെയിന്‍ വീണ്ടും ബൗളിംഗ് പുനരാരംഭിച്ചിട്ടുണ്ടെന്നും അത് ശുഭസൂചനയാണെന്നുമാണ് ബംഗ്ലാദേശിനോട് ഏറ്റ തോല്‍വിയ്ക്ക് ശേഷം സംസാരിക്കവേ ഫാഫ് ഡു പ്ലെസി പറഞ്ഞത്.
ദക്ഷിണാഫ്രിക്കയ്ക്ക് കാര്യങ്ങള്‍ അത്ര സുഖകരമല്ലെന്നും എന്നാല്‍ പ്രബുദ്ധമായ സ്പോര്‍ട്ടിംഗ് രാജ്യമാണ് തങ്ങളുടേതെങ്കിലും ഇനിയുള്ള മത്സരങ്ങളില്‍ മികച്ച പോരാട്ട വീര്യം ടീമില്‍ നിന്ന് താന്‍ ഉറപ്പ് നല്‍കുന്നുവെന്നും ദക്ഷിണാഫ്രിക്കന്‍ നായകന്‍ പറഞ്ഞു. നിലവില്‍ 50-60 ശതമാനം മാത്രം കളിയാണ് ടീം പുറത്തെടുക്കുന്നതെന്നും ബംഗ്ലാദേശിനു വരെ തങ്ങളെ പരാജയപ്പെടുത്താനാകുന്നു എന്നത് അതാണ് സൂചിപ്പിക്കുന്നതെന്നും ഫാഫ് ഡു പ്ലെസി അഭിപ്രായപ്പെട്ടു.
