ബൗളിംഗില്‍ വിക്കറ്റ് പട്ടികയില്‍ ക്രിസ് വോക്സ് ഇടം പിടിച്ചത് ഇന്നിംഗ്സിന്റെ അവസാനത്തോടെ മാത്രമാണെങ്കിലും അതിനു മുമ്പ് തന്നെ ക്യാച്ചുകളുമായി കളം നിറഞ്ഞ് നിന്നിരുന്നു ഇംഗ്ലണ്ടിന്റെ ഓപ്പണിംഗ് ബൗളര്‍. ഇംഗ്ലണ്ടിനു വേണ്ടി മോയിന്‍ അലി വീഴ്ത്തിയ മൂന്ന് വിക്കറ്റില്‍ രണ്ടും ക്യാച് പൂര്‍ത്തിയാക്കിയത് ക്രിസ് വോക്സ് ആയിരുന്നു. പിന്നീട് മുഹമ്മദ് ഹഫീസിനെ മാര്‍ക്ക് വുഡ് പുറത്താക്കിയപ്പോളും ക്യാച് നേടിയത് ക്രിസ് വോക്സ് ആയിരുന്നു. അതിനു ശേഷം തന്റെ ആദ്യ വിക്കറ്റായി സര്‍ഫ്രാസിനെ സ്വന്തം ബൗളിംഗില്‍ പിടിച്ചപ്പോള്‍ മത്സരത്തിലെ നാലാമത്തെ ക്യാച്ചാണ് ക്രിസ് വോക്സ് നേടിയത്. പിന്നീട് രണ്ട് വിക്കറ്റുകള്‍ കൂടി നേടി വോക്സ് 3 വിക്കറ്റ് മത്സരത്തില്‍ നിന്ന് നേടുകയായിരുന്നു.
2003ല്‍ ഇന്ത്യയുടെ മുഹമ്മദ് കൈഫാണ് വിക്കറ്റ് കീപ്പറല്ലാത്ത ഒരു താരം ലോകകപ്പ് മത്സരത്തില്‍ നാല് ക്യാച്ച് ആദ്യമായി പൂര്‍ത്തിയാക്കുന്നത്. പിന്നീട് സമാനമായ നേട്ടം 2015 ലോകകപ്പില്‍ മാത്രമാണ് പിറക്കുന്നത്. അന്ന് സ്കോട്‍ലാന്‍ഡിനെതിരെ ബംഗ്ലാദേശിന്റെ സൗമ്യ സര്‍ക്കാരാണ് ഈ നേട്ടം കൊയ്തത്. അതേ ലോകകപ്പില്‍ ഉമര്‍ അക്മല്‍ അയര്‍ലണ്ടിനെതിരെ നാല് ക്യാച്ചുകള്‍ പൂര്‍ത്തിയാക്കി. 2019ല്‍ ക്രിസ് വോക്സിന്റെ ഊഴമായിരുന്നു ഇത്തരം നേട്ടം സ്വന്തമാക്കുവാന്‍.
