പാക്കിസ്ഥാനെതിരെ വനിത ലോക ടി20യില്‍ ഇന്ത്യയുടെ ബാറ്റിംഗ് ആരംഭിക്കുമ്പോള്‍ തന്നെ സ്കോര്‍ ബോര്‍ഡ് 10/0 എന്ന നിലയിലായിരുന്നു. പിച്ചിലൂടെ ഓടിയതിനു പാക്കിസ്ഥാന്‍ വനിതകള്‍ക്കെതിരെ 10 റണ്‍സ് പിഴ ചുമത്തിയതിനാലാണ് ഇത്. പാക്കിസ്ഥാന്‍ ഇന്നിംഗ്സിലെ നടന്ന സംഭവമാണ് പിഴയീടാക്കുവാന്‍ ഐസിസിയെ പ്രേരിപ്പിച്ചത്. രണ്ട് തവണ പിച്ചിലൂടെ ഓടിയതിനു 5 റണ്‍സ് വീതം രണ്ട് തവണ പിഴ ഈടാക്കുകയായിരുന്നു.
ഇന്ത്യന്‍ താരങ്ങള്‍ ഫീല്‍ഡില്‍ ഒരു മോശം ദിവസമായിരുന്നു ഇന്നലെ. കുറഞ്ഞത് മൂന്ന് ക്യാച്ചുകളെങ്കിലും ടീമംഗങ്ങള്‍ പാക്കിസ്ഥാനെതിരെ കൈവിട്ട ദിവസം ഇന്ത്യ 6 പന്ത് ശേഷിക്കെയാണ് വിജയം കരസ്ഥമാക്കിയത്. ഇതില്‍ തന്നെ വെറുതേ കിട്ടിയ 10 റണ്‍സ് ഏറെ നിര്‍ണ്ണായകമായിയെന്ന് വേണം വിലയിരുത്തുവാന്‍.
പാക്കിസ്ഥാന്‍ 134 റണ്‍സ് നേടിയെങ്കിലും സ്കോര്‍ 133 റണ്‍സായി ചുരുക്കുകയും ഇന്ത്യയുടെ സ്കോര്‍ ബോര്‍ഡിലേക്ക് 10 റണ്‍സ് നല്‍കുകയുമാണ് അമ്പയര്‍മാര്‍ ചെയ്തത്.
