ഈ വർഷം ഓസ്ട്രേലിയയിൽ നടക്കേണ്ട ടി20 ലോകകപ്പ് മാറ്റിവെക്കുന്നതിനെ തീരുമാനം ജൂലൈ മാസത്തിൽ മാത്രമായിരിക്കുമെന്ന് ന്യൂസിലാൻഡ് ക്രിക്കറ്റ് ബോർഡ് മേധാവി ഡേവിഡ് വൈറ്റ്. നിലവിലെ സാഹചര്യത്തിൽ ഓസ്‌ട്രേലിയൻ ക്രിക്കറ്റ് ബോർഡ് ഗവൺമെന്റുമായി ചേർന്ന് നേരത്തെ തീരുമാനിച്ച പ്രകാരം ഒക്ടോബർ- നവംബർ മാസത്തിൽ ടൂർണമെന്റ് നടത്താനുള്ള ശ്രമത്തിലാണെന്നും ഡേവിഡ് വൈറ്റ് പറഞ്ഞു.
നിലവിൽ ടൂർണമെന്റിന്റെ ഭാവിയുമായി ബന്ധപ്പെട്ട് ഒരുപാട് ചർച്ചകൾ നടക്കുന്നുണ്ടെന്നും എന്നാൽ ടൂർണമെന്റ് മാറ്റിവെക്കുന്നത് സംബന്ധിച്ച അവസാന തീരുമാനം ജൂലൈയിൽ മാത്രമേ ഉണ്ടാവു എന്നും ഡേവിഡ് വൈറ്റ് പറഞ്ഞു. കൊറോണ വൈറസ് ബാധ ലോകത്താകമാനം ബാധിച്ചതോടെ നിരവധി കായിക മത്സരങ്ങൾ നിർത്തിവെച്ചിരുന്നു. ഇതിന്റെ ഭാഗമായി ടി20 ക്രിക്കറ്റ് ലോകകപ്പ് അടുത്ത വർഷം ഫെബ്രുവരിയിൽ നടത്താനുള്ള ശ്രമങ്ങളും ക്രിക്കറ്റ് ഓസ്ട്രേലിയ നടത്തുന്നുണ്ടെന്ന് നേരത്തെ റിപ്പോർട്ടുകൾ വന്നിരുന്നു.
