രാധ യാദവിന് 4 വിക്കറ്റ്, ഷഫാലിയുടെ വെടിക്കെട്ട് പ്രകടനം, ശ്രീലങ്കയ്ക്കെതിരെ മികച്ച വിജയവുമായി ഇന്ത്യ

- Advertisement -

വനിത ടി20 ലോകകപ്പില്‍ തങ്ങളുടെ അവസാന മത്സരത്തിലും വിജയിച്ച് ജൈത്രയാത്ര തുടര്‍ന്ന് ഇന്ത്യ. ഇന്ന് നടന്ന മത്സരത്തില്‍ ആദ്യം ബാറ്റ് ചെയ്ത ശ്രീലങ്കയെ 113/9 എന്ന സ്കോറില്‍ ഒതുക്കിയ ശേഷം ഷഫാലി വര്‍മ്മയുടെ വെടിക്കെട്ട് പ്രകടനത്തിന്റെ മികവില്‍ ഇന്ത്യ 7 വിക്കറ്റ് വിജയം നേടുകയായിരുന്നു.

ഇന്ത്യ ചെറിയ ലക്ഷ്യം 3 വിക്കറ്റ് നഷ്ടത്തില്‍ 14.4 ഓവറില്‍ മറികടക്കുകയായിരുന്നു. ഷഫാലി 34 പന്തില്‍ 47 റണ്‍സുമായി തന്റെ ഫോം തുടര്‍ന്നപ്പോള്‍ സ്മൃതി മന്ഥാന(17), ഹര്‍മ്മന്‍പ്രീത് കൗര്‍(15) എന്നിവരും റണ്‍സ് കണ്ടെത്തി.

നേരത്തെ ശ്രീലങ്കയുടെ നടുവൊടിച്ചത് 4 വിക്കറ്റുകള്‍ നേടിയ രാധ യാദവ് ആയിരുന്നു. രാജേശ്വരി ഗായക്വാഡ് രണ്ട് വിക്കറ്റും നേടി. ശ്രീലങ്കയ്ക്കായി ക്യാപ്റ്റന്‍ ചാമരി അട്ടപ്പട്ടു 33 റണ്‍സുമായി ടോപ് സ്കോറര്‍ ആയപ്പോള്‍ വാലറ്റത്തില്‍ പുറത്താകാതെ 25 റണ്‍സ് നേടിയ കവിഷ ദില്‍ഹാരിയാണ് ടീമിനെ 113 എന്ന സ്കോറിലേക്ക് എത്തുവാന്‍ സഹായിച്ചത്.

Advertisement