2006 മുതല്‍ ഇന്ത്യയെ ടി20യില്‍ പ്രതിനിധീകരിച്ച് വരുന്ന തനിക്ക് ഇപ്പോള്‍ ടി20യില്‍ നിന്ന് വിരമിക്കുന്നതാണ് ശരിയായ തീരുമാനമെന്ന് തോന്നുന്നുവെന്ന് പറഞ്ഞ് മുന്‍ ഇന്ത്യന്‍ ടി20 നായിക മിത്താലി രാജ്. 2021 ഏകദിന ലോകകപ്പിനായി തന്നെ തയ്യാറാക്കുന്നതിനായി തന്റെ സര്‍വ്വ ഊര്‍ജ്ജവും സംരക്ഷിച്ച് വയ്ക്കുന്നതിനായി ഈ വിരമിക്കല്‍ ഗുണം ചെയ്യുമെന്നാണ് കരുതുന്നതെന്ന് മിത്താലി പറഞ്ഞു. രാജ്യത്തിനായി ലോകകപ്പ് വിജയിക്കണമെന്നത് തന്റെ സ്വപ്നമാണ്, അതിന് തന്റെ ഏറ്റവും മികച്ച പ്രകടനം നല്‍കണമെന്നുണ്ട്.
തന്നെ ഇതുവരെ പിന്തുണച്ച് പോന്ന ബിസിസിഐയ്ക്ക് നന്ദിയുണ്ടെന്ന് താരം പറഞ്ഞു. ദക്ഷിണാഫ്രിക്കന്‍ വനിതകള്‍ക്കെതിരെ ഇന്ത്യന്‍ ടി20 ടീമിന് എല്ലാവിധ ആശംസകളും നേരുന്നതായി മിത്താലി രാജ് അറിയിച്ചു. കഴിഞ്ഞ ഒരു വര്‍ഷമായി ഇന്ത്യന്‍ ടീം മാനേജ്മെന്റുമായി അത്ര സുഖത്തിലല്ല മിത്താലിയെന്ന് വേണം മനസ്സിലാക്കുവാന്‍. രമേശ് പവാറുമായി ലോകകപ്പിന് ശേഷമുള്ള തര്‍ക്കങ്ങള്‍ക്ക് ശേഷം ഇന്ത്യന്‍ കോച്ച് മാറിയിട്ടും മിത്താലിയെ ടി20 ടീമിലേക്ക് അധികം പരിഗണിക്കപ്പെടുന്നില്ലായിരുന്നു.
