ശ്രീലങ്കയ്ക്കെതിരെ ഇന്ത്യന്‍ വനിതകള്‍ക്ക് ഏകദിന പരമ്പര വിജയം. മത്സരത്തില്‍ ആദ്യം ബാറ്റ് ചെയ്യാനിറങ്ങിയ ഇന്ത്യ ഒരു ഘട്ടത്തില്‍ 36/3 എന്ന നിലയില്‍ വീണ ശേഷം കരകയറി 219 റണ്‍സ് എന്ന സ്കോറിലേക്ക് എത്തുകയായിരുന്നു. മിത്താലി രാജ്(52), താനിയ ഭാട്ടിയ(68) എന്നിവര്‍ക്കൊപ്പം ദയാലന്‍ ഹേമലത(35) കൂടി സ്കോറിംഗ് ദൗത്യം ഏറ്റെടുത്തുവെങ്കിലും 50ാം ഓവറില്‍ ഇന്ത്യ 219 റണ്‍സിനു ഓള്‍ഔട്ട് ആവുകയായിരുന്നു. ശ്രീലങ്കയ്ക്കായി ചാമരി അട്ടപ്പട്ടു മൂന്ന് വിക്കറ്റ് നേടിയപ്പോള്‍ ഉദ്ദേശിക പ്രബോധിനി, ശ്രീപാലി വീരക്കോഡി എന്നിവര്‍ രണ്ടും ഇനോക രണവീര, ശശികല സിരിവര്‍ദ്ധനേ എന്നിവര്‍ ഓരോ വിക്കറ്റും നേടി.
ക്യാപ്റ്റന്‍ ചാമരി അട്ടപ്പട്ടവും ശശികല സിരിവര്‍ദ്ധനേയും ശ്രീലങ്കയെ മുന്നോട്ട് നയിച്ചുവെങ്കിലും ഇന്ത്യന്‍ സ്കോറിനു 7 റണ്‍സ് അകലെ വരെയെത്തുവാനേ ടീമിനു സാധിച്ചുള്ളു. അവസാന ഓവറുകളില്‍ നീലാക്ഷി ഡിസില്‍വ 19 പന്തില്‍ 31 റണ്‍സുമായി ഇന്ത്യന്‍ ക്യാമ്പില്‍ ആശങ്ക പരത്തിയെങ്കിലും 48.1 ഓവറില്‍ ഇന്ത്യ ശ്രീലങ്കയെ ഓള്‍ഔട്ട് ആക്കി.
10 ഓവര്‍ പിന്നിടുമ്പോള്‍ 40/3 എന്ന നിലയിലായിരുന്ന ശ്രീലങ്കയ്ക്കായി നാലാം വിക്കറ്റില്‍ 89 റണ്‍സ് നേടി മുന്നോട്ട് നയിച്ചുവെങ്കിലും ശശികല റണ്ണൗട്ട് രൂപത്തില്‍ പുറത്തായത് ടീമിനു തിരിച്ചടിയായി. ചാമരി അട്ടപട്ടു അടുത്ത ഓവറില്‍ പുറത്തായതോടെ ശ്രീലങ്കയുടെ കാര്യം പരുങ്ങലിലായി. നീലാക്ഷി ഡിസില്‍വയുടെ മികവില്‍ 165/7 എന്ന നിലയില്‍ നിന്ന് 205/7 എന്ന നിലയിലേക്ക് ശ്രീലങ്ക മുന്നോട്ട് നീങ്ങിയെങ്കിലും പിന്നീട് ഇന്ത്യന്‍ ബൗളര്‍മാര്‍ ശക്തമായി തിരിച്ചടിക്കുകയായിരുന്നു.
ഇന്ത്യയ്ക്കായി മാനസി ജോഷി, രാജേശ്വരി ഗായക്വാഡ് എന്നിവര്‍ രണ്ടും ശിഖ പാണ്ഡേ, പൂനം യാദവ്, ദീപ്തി ശര്‍മ്മ എന്നിവര്‍ ഓരോ വിക്കറ്റും നേടി.
