കേരളത്തെ ഞെട്ടിച്ച് ഹിമാച്ചല്‍, ജയം ഒരു വിക്കറ്റിനു

വിജയ് ഹസാരെ ട്രോഫിയില്‍ തങ്ങളുടെ രണ്ടാം മത്സരത്തില്‍ ജയം സ്വന്തമാക്കാമെന്ന കേരളത്തിന്റെ മോഹങ്ങള്‍ക്ക് തിരിച്ചടി. ആദ്യം ബാറ്റ് ചെയ്ത കേരളം സച്ചിന്‍ ബേബി(95), വിഷ്ണു വിനോദ്(66) എന്നിവരുടെ ബാറ്റിംഗ് മികവില്‍ 271 റണ്‍സ് നേടുകയായിരുന്നു. മറുപടി ബാറ്റിംഗിനിറങ്ങിയ ഹിമാച്ചല്‍ ഒരു വിക്കറ്റ് ശേഷിക്കെ വിജയം സ്വന്തമാക്കി. ഹിിമാച്ചലിന്റെ ടോപ് ഓര്‍ഡറിനെ അക്ഷയ് കെസി വീഴ്ത്തിയപ്പോള്‍ വാലറ്റത്തെ ചുരുട്ടിക്കെട്ടിയത് കെഎം ആസിഫ് ആയിരുന്നു.  എന്നാല്‍ പത്താം വിക്കറ്റ് സ്വന്തമാക്കുവാന്‍  കേരളത്തിനാകാതെ പോയപ്പോള്‍ ജയം ഹിമാച്ചല്‍ സ്വന്തമാക്കി. 83 റണ്‍സുമായി പുറത്താകാതെ നിന്ന അങ്കിത് കൗശിക് ആണ് മത്സരം കേരളത്തില്‍ നിന്ന് തട്ടിത്തെറിപ്പിച്ചത്.

അക്ഷയ് കെസി തന്റെ 10 ഓവറില്‍ 32 റണ്‍സിനു നാല് വിക്കറ്റ് വീഴ്ത്തിയപ്പോള്‍ ആസിഫ് 3 വിക്കറ്റാണ് നേടിയത്. സന്ദീപ് വാര്യറിനു 2 വിക്കറ്റ് ലഭിച്ചു.

ഹിമാച്ചലിനു വേണ്ടി 62 റണ്‍സ് നേടി നിഖില്‍ ഗംഗ്ത, അമിത് കുമാര്‍ (32) ആണ് ബാറ്റിംഗില്‍ തിളങ്ങിയ മറ്റു താരങ്ങള്‍. 219/9 എന്ന നിലയില്‍ നിന്നാണ് അവസാന വിക്കറ്റില്‍ 64 റണ്‍സ് നേടി കൗശിക്-വിനയ് ഗലേറ്റിയ കൂട്ടുകെട്ട് ഹിമാച്ചലിനെ രക്ഷിച്ചത്. ഇതില്‍ ഒരു റണ്‍സാണ് വിനയുടെ സംഭാവന. അവസാന ഓവറില്‍ 20 റണ്‍സ് വിജയത്തിനായി വേണ്ടിയിരുന്ന ഹിമാച്ചലിനെ കൗശിക വിജയത്തിലേക്ക് നയിക്കുകയായിരുന്നു. 77 പന്തില്‍ നിന്ന് 7 ബൗണ്ടറിയും 2 സിക്സും സഹിതമാണ് കൗശിക് തന്റെ കളി ജയിപ്പിച്ച ഇന്നിംഗ്സ് പുറത്തെടുത്തത്.

കൂടുതൽ കായിക വാർത്തകൾക്ക് : www.facebook.com/FanportOfficial