യോഗ്യത മാനദണ്ഡങ്ങള്‍ തെറ്റായി കാണിച്ചുവെന്നാരോപിച്ച് പുതുച്ചേരിയുടെ എട്ട് താരങ്ങളുടെ രജിസ്ട്രേഷന്‍ റദ്ദാക്കി ബിസിസിഐ. വിജയ് ഹസാരെ ട്രോഫിയില്‍ ഉത്തരാഖണ്ഡിനെ നേരിടാനൊരുങ്ങുന്ന ടീമിനു ഈ നീക്കം തിരിച്ചടിയായിട്ടുണ്ട്. എട്ട് താരങ്ങള്‍ക്ക് പകരം പുതിയ താരങ്ങളെ ഉള്‍പ്പെടുത്തിയാണ് പുതുതായി ബിസിസിഐയില്‍ അംഗത്വം നേടിയ പുതുച്ചേരി ഇന്ന് മത്സരത്തിനിറങ്ങിയത്.
പുതുച്ചേരി അതിഥി താരങ്ങളായി കൊണ്ടുവന്ന താരങ്ങളുടെ എണ്ണം അധികമായിയെന്നാണ് പുറത്ത് വരുന്ന ഒരു കാരണം. ബിസിസിഐ ഇത് 3 ആക്കി പരിമിതപ്പെടുത്തിയിട്ടുണ്ടെങ്കിലും അതിലധികം താരങ്ങള്‍ പുതുച്ചേരിയ്ക്ക് വേണ്ടി കളിച്ചുവെന്നാണ് അറിയുന്നത്. മലയാളി താരം നിഖിലേഷ് സുരേന്ദ്രനും രജിസട്രേഷന്‍ റദ്ദാക്കപ്പെട്ട താരങ്ങളില്‍ ഉള്‍പ്പെടുന്നു എന്ന് അറിയുന്നു.
ഇത് കൂടാതെ താരങ്ങളുടെ വിദ്യാഭ്യാസ അല്ലെങ്കില്‍ തൊഴില്‍ രേഖകളും ഒരു മാസത്തില്‍ താഴെ മാത്രമുള്ളതാണെന്നും കണ്ടെത്തിയിട്ടുണ്ട്. ഓഗസ്റ്റ് 2018 മുതല്‍ മാത്രം പുതുച്ചേരിയില്‍ താമസിക്കുന്നതോ പഠിക്കുന്നതോ ആയ താരങ്ങള്‍ക്ക് അവര്‍ക്കായി കളിക്കാനാകില്ലെന്ന നിയമം നിലനില്‍ക്കെയാണ് ഇത്.
