സൂപ്പര്‍ ഓവറില്‍ വിജയം ടീം യുണൈറ്റഡിന്

- Advertisement -

ടിപിഎല്‍ 2020ലെ ആദ്യ സൂപ്പര്‍ മത്സരത്തില്‍ വിജയം കരസ്ഥമാക്കി ടീം യുണൈറ്റഡ്. ഇന്ന് ഐസിഫോസിനെതിരെയുള്ള മത്സരത്തില്‍ ഇരു ടീമുകളും 86 റണ്‍സ് നേടി തുല്യത പാലിച്ചപ്പോള്‍ സൂപ്പര്‍ ഓവറില്‍ വിജയം യുണൈറ്റഡിനൊപ്പം നിന്നു. മത്സരത്തില്‍ ആദ്യം ബാറ്റ് ചെയ്ത ടീം യുണൈറ്റഡ് 86/6 എന്ന സ്കോറാണ് എട്ടോവറില്‍ നിന്ന് നേടിയത്. 12 പന്തില്‍ 27 റണ്‍സ് നേടിയ റെജി, 9 പന്തില്‍ 21 റണ്‍സ് നേടി ദീപക് മോഹന്‍ എന്നിവര്‍ക്കൊപ്പം രഞ്ജു കുമാറും(18) ടീം യുണൈറ്റഡ് ബാറ്റിംഗില്‍ തിളങ്ങുകയായിരുന്നു. ഐസിഫോസിന് വേണ്ടി ശിവപ്രസാദ് മൂന്ന് വിക്കറ്റ് നേടി.

ഐസി ഫോസിന് വേണ്ടി പിഎം മനുവും പ്രദീപ് ഫ്രെഡ്ഡിയും തകര്‍ത്തടിച്ചപ്പോള്‍ ടീം യുണൈറ്റഡിന്റെ സ്കോറിനൊപ്പമെത്തുവാന്‍ ഐസിഫോസിനായി. മനു 28 പന്തില്‍ 48 റണ്‍സ് നേടിയപ്പോള്‍ പ്രദീപ് ഫ്രെഡ്ഡി 18 പന്തില്‍ നിന്ന് 28 റണ്‍സ് നേടി. അവസാന ഓവറില്‍ വിജയിക്കുവാന്‍ 18 റണ്‍സ് വേണ്ടിയിരുന്നു ഐസിഫോസിനായി ആദ്യ രണ്ട് പന്തുകളില്‍ സിക്സുമായി മനു ടീമിനെ ലക്ഷ്യത്തിന് അടുത്തെത്തിച്ചു. അടുത്ത പന്തില്‍ ഡബിള്‍ നേടിയതോടെ ലക്ഷ്യം വെറും 3 പന്തില്‍ നാലായി മാറിയെങ്കിലും അടുത്ത പന്തില്‍ മനു പുറത്തായത് ടീമിന് തിരിച്ചടിയായി. അവസാന പന്തില്‍ ജയിക്കുവാന്‍ മൂന്ന് റണ്‍സ് വേണ്ടിയിരുന്ന ഐസിഫോസിന് രണ്ട് റണ്‍സ് മാത്രമേ നേടാനായുള്ളു.

സൂപ്പര്‍ ഓവറില്‍ ആദ്യം ബാറ്റ് ചെയ്ത ഐസിഫോസിന് വെറും 7 റണ്‍സാണ് ഒരു വികക്റ്റ് നഷ്ടത്തില്‍ നേടാനായത്. വലിയ ഷോട്ട് ഒന്നും തന്നെ നേടുവാന്‍ താരങ്ങള്‍ക്കായില്ല. ബാറ്റിംഗിനിറങ്ങിയ ടീം യുണൈറ്റഡിന് ആദ്യ പന്തില്‍ തന്നെ വിക്കറ്റ് നഷ്ടമായെങ്കിലും അടുത്ത രണ്ട് പന്തുകളില്‍ ഒരു സിക്സും ഫോറും നേടി രഞ്ജു ടീമിനെ വിജയത്തിലേക്ക് നയിച്ചു.

Advertisement