ഏഷ്യാ കപ്പിലൂടെ ഏകദിനത്തിൽ അരങ്ങേറ്റം ഉണ്ടാകും എന്ന് ഒരിക്കലും പ്രതീക്ഷിച്ചിരുന്നില്ല എന്ന് യുവ ബാറ്റർ തിലക് വർമ്മ. ഏഷ്യ കപ്പിനുള്ള ഇന്ത്യൻ ടീമിൽ എത്തിയതിനെ കുറിച്ച് സംസാരിക്കുകയായിരുന്നു യുവതാരം. “ഏഷ്യകപ്പിലൂടെ നേരിട്ട് ഏകദിനത്തിൽ അരങ്ങേറ്റം കുറിക്കുന്നതിനെക്കുറിച്ച് ഞാൻ ഒരിക്കലും ചിന്തിച്ചിട്ടില്ല. ഇന്ത്യയ്ക്കായി കളിക്കണമെന്ന് ഞാൻ എപ്പോഴും സ്വപ്നം കാണുന്നു, എന്നാൽ ഒരു വർഷം രണ്ട് ഫോർമാറ്റുകളിൽ അരങ്ങേറ്റം കുറിക്കുന്നത് എന്നെ സംബന്ധിച്ചിടത്തോളം വലിയ കാര്യമാണ്, അതിനാൽ ഞാൻ അതിനായി തയ്യാറെടുക്കുകയാണ്,” നിലവിൽ അയർലൻഡിലുള്ള വർമ്മ ബിസിസിഐ പങ്കിട്ട വീഡിയോയിൽ പറഞ്ഞു.
🗣️🗣️ I want to do well and I'm pretty confident playing one day cricket.@TilakV9 describes his feelings after getting selected for #AsiaCup2023 👌👌 – By @RajalArora #TeamIndia pic.twitter.com/79A85QGcug
— BCCI (@BCCI) August 22, 2023
തന്നെ രോഹിത് ശർമ്മ വലിയ രീതിയിൽ പിന്തുണക്കുന്നുണ്ട് എന്നും വർമ്മ പറഞ്ഞു. “ഐപിഎല്ലിൽ പോലും രോഹിത് ഭായ് എപ്പോഴും എന്നെ പിന്തുണച്ചിട്ടുണ്ട്. ഞാൻ മുംബൈ ഇന്ത്യൻസിൽ ചേരുമ്പോൾ ഞാൻ വളരെ സമ്മദ്ദത്തിൽ ആയിരുന്നു, പക്ഷേ എന്റെ അടുത്ത് വന്ന് എന്നോട് സംസാരിച്ചത് അദ്ദേഹമായിരുന്നു. കളി ആസ്വദിക്കാൻ അദ്ദേഹം എന്നോട് ആവശ്യപ്പെട്ടു, ‘എപ്പോൾ വേണമെങ്കിലും എന്നെ ബന്ധപ്പെടാൻ മടിക്കേണ്ടതില്ല. എനിക്ക് മെസ്സേജ് ചെയ്യുക അല്ലെങ്കിൽ എന്നെ വിളിക്കുക, ഞാൻ നിങ്ങൾക്കായി ഉണ്ടാകും’ എന്നും പറഞ്ഞു” വർമ്മ രോഹിതിന്റെ പ്രാധാന്യത്തെ കുറിച്ച് പറഞ്ഞു.