സയ്ദ് മുഷ്താഖ് അലി ട്രോഫിയിൽ ഉത്തർപ്രദേശിനെതിരെ കേരളത്തിന് ജയം. മഴ കളി തടസ്സപെടുത്തിയപ്പോൾ മഴ നിയമത്തിന്റെ പിൻബലത്തിൽ വെറും 1 റണ്ണിനാണ് കേരളം ഉത്തർപ്രദേശിനെ തോൽപ്പിച്ചത്. കേരളം ഉയർത്തിയ 119 റൺസിന് മറുപടിയായി ബാറ്റിംഗ് ആരംഭിച്ച ഉത്തർപ്രദേശ് 7 ഓവറിൽ 4 വിക്കറ്റ് നഷ്ടത്തിൽ 42 റൺസ് എടുത്തുനിൽക്കേയാണ് മഴ കളി മുടക്കിയത്.
തുടർന്നാണ് കേരളത്തെ വിജയികളായി പ്രഖ്യാപിച്ചത്. കേരളത്തിന് വേണ്ടി ജലജ് സക്സേന രണ്ട് വിക്കറ്റ് വീഴ്ത്തിയപ്പോൾഅക്ഷയ് ചന്ദ്രൻ ഒരു വിക്കറ്റ് വീഴ്ത്തി. ഉത്തർപ്രദേശിന് അക്ഷദീപ് നാഥ് 27 പന്തിൽ 30 റൺസ് എടുത്ത് പുറത്താവാതെ നിന്നു. നേരത്തെ സഞ്ജു സാംസന്റെ 38 റൺസിന്റെ പിൻബലത്തിലാണ് കേരളം 8 വിക്കറ്റ് നഷ്ടത്തിൽ 119 റൺസ് എടുത്തത്.