വരാനിരിക്കുന്ന ദുലീപ് ട്രോഫിയിൽ നോർത്ത് സോൺ ടീമിനെ നയിക്കുമെന്ന് പ്രതീക്ഷിച്ചിരുന്ന ഇന്ത്യൻ ടെസ്റ്റ് ക്യാപ്റ്റൻ ശുഭ്മാൻ ഗിൽ രോഗം കാരണം ടൂർണമെന്റിൽ നിന്ന് വിട്ടുനിൽക്കുമെന്ന് റിപ്പോർട്ട്. ഓഗസ്റ്റ് 28-ന് ബെംഗളൂരുവിലെ ബി.സി.സി.ഐ സെന്റർ ഓഫ് എക്സലൻസ് ഗ്രൗണ്ടിൽ ആരംഭിക്കുന്ന ടൂർണമെന്റിൽ ഗില്ലിന്റെ അഭാവത്തിൽ വൈസ് ക്യാപ്റ്റൻ അങ്കിത് കുമാർ ടീമിനെ നയിക്കും.
നിലവിൽ ചണ്ഡീഗഡിലെ വീട്ടിൽ വിശ്രമിക്കുന്ന ഗിൽ, ടീം ഫിസിയോതെറാപ്പിസ്റ്റുകളുടെ നിരീക്ഷണത്തിലാണ്. താരത്തിന്റെ ആരോഗ്യ റിപ്പോർട്ട് ബി.സി.സി.ഐക്ക് സമർപ്പിച്ചുകഴിഞ്ഞു. ഗില്ലിന്റെ അഭാവം നോർത്ത് സോണിന് ഒരു തിരിച്ചടിയാണെങ്കിലും, ആയുഷ് ബദോനി, യഷ് ധുൽ, മായങ്ക് ദാഗർ എന്നിവരടങ്ങിയ ശക്തമായ നിര ടീമിലുണ്ട്. ശുഭ്മാൻ ഗില്ലിന് പകരക്കാരനായി ശുഭം രോഹില്ലയെ ടീമിൽ ഉൾപ്പെടുത്തിയിട്ടുണ്ട്.
കൂടാതെ, അർഷ്ദീപ് സിങ്ങും ഹർഷിത് റാണയും ഏഷ്യാ കപ്പ് മത്സരങ്ങൾക്കായി പോകുന്നതിന് മുൻപ് ആദ്യ മത്സരത്തിൽ മാത്രമാണ് കളിക്കുക. ഇത് അങ്കിത് കുമാറിന് കൂടുതൽ ഉത്തരവാദിത്തങ്ങൾ നൽകും.