ശ്രേയസ് അയ്യർ പരിക്ക് മാറി എത്തുന്നു. പുറം വേദന കാരണം ബുദ്ധിമുട്ടുന്ന താരം കഴിഞ്ഞ രഞ്ജി മത്സരത്തിൽ നിന്ന് മാറി നിന്നിരുന്നു. മാർച്ച് 2ന് നടക്കുന്ന തമിഴ്നാടിന് എതിരായ രഞ്ജി ട്രോഫി സെമി പോരാട്ടത്തിൽ ശ്രേയസ് അയ്യർ മുംബൈ ടീമിനൊപ്പം ഉണ്ടാകും. ആഭ്യന്തര ക്രിക്കറ്റ് കളിക്കാൻ തയ്യാറാകാത്തവർക്ക് എതിരെ നടപടിയെടുക്കും എന്ന് ബി സി സി ഐ പറഞ്ഞിരുന്നു ഇതിനു പിന്നാലെയാണ് ശ്രേയസ് മുംബൈക്ക് ആയി കളിക്കാൻ തയ്യാറായത്.
നേരത്തെ ഇംഗ്ലണ്ടിനെതിരായ ആദ്യ രണ്ടു ടെസ്റ്റിൽ ശ്രേയസ് ഉണ്ടായിരുന്നു. രണ്ട് ടെസ്റ്റിലും നല്ല പ്രകടനമായിരുന്നില്ല കാഴ്ചവെച്ചത്. ഹൈദരാബാദിലും വിശാഖപട്ടണത്തും നടന്ന ആദ്യ രണ്ട് ടെസ്റ്റുകളിൽ ആയി 35, 13, 27, 29 എന്നീ സ്കോറുകൾ ആയിരുന്നു അയ്യർ നേടിയത്. തുടർന്ന് ഇന്ത്യ ബാക്കി മൂന്ന് ടെസ്റ്റുകളിൽ നിന്ന് അയ്യറിനെ ഒഴിവാക്കി. ഇത് ഫോം ഔട്ട് ആയതു കൊണ്ടാണോ പരിക്ക് കൊണ്ടാണോ എന്ന് ബി സി സി ഐ വ്യക്തമാക്കിയിരുന്നില്ല.