ഇന്ത്യയുടെ ഏകദിന ടീമിലേക്ക് വരേണ്ട താരമാണ് സർഫറാസ് ഖാൻ എന്ന് സഞ്ജയ് മഞ്ജരേക്കർ. ഇംഗ്ലണ്ടിനെതിരായ മൂന്നാം ടെസ്റ്റിലെ സർഫറാസ് ഖാന്റെ പ്രകടനത്തെ കുറിച്ച് സംസാരിക്കുക ആയിരുന്നു സഞ്ജയ് മഞ്ജരേക്കർ. അരങ്ങേറ്റ ടെസ്റ്റിൽ രണ്ട് മത്സരങ്ങളിലും സർഫറാസ് അർധ സെഞ്ച്വറി നേടിയിരുന്നു.
ആദ്യ ഇന്നിംഗ്സിൽ സർഫറാസ് 66 പന്തിൽ 9 ഫോറും 2 സിക്സും സഹിതം 62 റൺസ് നേടി റണ്ണൗട്ട് ആയി. രണ്ടാം ഇന്നിംഗ്സിൽ അദ്ദേഹം 72 പന്തിൽ 6 ഫോറും 3 സിക്സും സഹിതം 68 റൺസുമായി സർഫറാസ് പുറത്താകാതെ നിൽക്കുകയും ചെയ്തു.
26 കാരനായ സർഫറാസ് 50 ഓവർ ഫോർമാറ്റിൽ ഇന്ത്യയുടെ മധ്യനിരയ്ക്ക് ഒരു മുതൽകൂട്ടാകും എന്ന് മഞ്ജരേക്കർ പറഞ്ഞു. “ഇന്ത്യ ഒരു മികച്ച 50 ഓവർ മിഡിൽ ഓർഡർ ബാറ്റർ ഓപ്ഷൻ കണ്ടെത്തിയെന്ന് ഞാൻ കരുതുന്നു, മധ്യ ഘട്ടത്തിൽ ബാറ്റ് ചെയ്യാൻ, സർക്കിളിനുള്ളിൽ 5 ഫീൽഡർമാരുള്ളപ്പോൾ ബാറ്റ്ചെയ്യാൻ, സർഫ്രാസ് ഖാനാണ് വേണ്ടത്.” മഞ്ജരേക്കർ പറഞ്ഞു.