മുൻ ഇന്ത്യൻ വിക്കറ്റ് കീപ്പർ-ബാറ്ററായ സാബ കരീം സഞ്ജു സാംസണ് സ്ഥിരത ഇല്ലായെന്ന് വിമർശിച്ചു. ഇന്ത്യൻ ടീമിൽ ഒരു സ്ഥാനം ഉറപ്പിക്കാൻ അനുവദിക്കുന്ന സ്ഥിരത സഞ്ജു സാംസൺ കാണിക്കണമെന്നും അദ്ദേഹം പറഞ്ഞു. വെസ്റ്റ് ഇൻഡീസിനെതിരായ ഏകദിന പരമ്പരയ്ക്കുള്ള ടീമിൽ സഞ്ജു സാംസൺ ഇടം നേടിയിരുന്നു.
“നിങ്ങൾക്ക് നിലവിൽ പല പ്രധാന താരങ്ങളും ഇല്ലാത്തതിനാൽ, സഞ്ജു സാംസൺ ഇലവനിൽ ഉണ്ടാകണമെന്ന് ഞാൻ ആഗ്രഹിക്കുന്നു. അദ്ദേഹം നിലവിൽ ടീമിലുള്ള കളിക്കാരെ വെല്ലുവിളിക്കുന്ന തരത്തിൽ സ്ഥിരമായി കളിക്കുകയും നല്ല പ്രകടനം നടത്തുകയും വേണം.” സാബ കരീം പറയുന്നു.
“നിർഭാഗ്യവശാൽ, സാംസണ് ഇതുവരെ അത് ചെയ്യാൻ കഴിഞ്ഞിട്ടില്ല. ഐപിഎല്ലിലും ഇടയ്ക്ക് സഞ്ജു നല്ല പ്രകടനം പുറത്തെടുത്തു. ഈ വർഷം യശസ്വി ജയ്സ്വാളും തിലക് വർമ്മയും കാണിച്ച സ്ഥിരത സഞ്ജു സാംസണിന്റെ ബാറ്റിംഗിൽ കാണാൻ ഞാൻ ആഗ്രഹിക്കുന്നു. ഇത് കാണാനില്ല,” കരീം ന്യൂസ് 24-ൽ പറഞ്ഞു.
“സാംസണിൽ എനിക്ക് ഒരുപാട് പ്രതീക്ഷകളുണ്ട്, കാരണം അദ്ദേഹത്തിന് കഴിവുണ്ട്, പക്ഷേ നിർഭാഗ്യവശാൽ ഉണ്ടായിരിക്കേണ്ട സ്ഥിരത അദ്ദേഹത്തിന് ഇല്ല. അത് കൊണ്ട് മാത്രമാണ് അദ്ദേഹം ഇന്ത്യൻ ടീമിൽ അദ്ദേഹം സ്ഥാനം നേടാത്തത്.” അദ്ദേഹം കൂട്ടിച്ചേർത്തു.