ഇംഗ്ലീഷ് ഓൾറൗണ്ടർ സാം കറനെ 2026-ലെ ‘ദ ഹണ്ട്രഡ്’ ക്രിക്കറ്റ് ടൂർണമെന്റിനുള്ള എംഐ ലണ്ടൻ (മുമ്പ് ഓവൽ ഇൻവിൻസിബിൾസ്) ടീമിന്റെ നായകനായി നിയമിച്ചു. മുംബൈ ഇന്ത്യൻസ് മാനേജ്മെന്റ് ടീമിനെ ഏറ്റെടുത്തതിന് ശേഷമുള്ള ആദ്യ പ്രധാന പ്രഖ്യാപനമാണിത്. സാം കറനെ കൂടാതെ സൂപ്പർ താരം വിൽ ജാക്സിനെയും ടീം നിലനിർത്തിയിട്ടുണ്ട്. വനിതാ ടീമിലേക്ക് ഡാനി വൈറ്റ്-ഹോഡ്ജിനെയും എംഐ ലണ്ടൻ കരാറിലെത്തിച്ചു.
27-കാരനായ സാം കറന് ട്വന്റി-20 ക്രിക്കറ്റിൽ വലിയ അനുഭവസമ്പത്തുണ്ട്. 317 മത്സരങ്ങളിൽ നിന്നായി 5,296 റൺസും 298 വിക്കറ്റുകളും താരം നേടിയിട്ടുണ്ട്. ഐപിഎല്ലിൽ പഞ്ചാബ് കിംഗ്സിനെ നയിച്ച പരിചയവും ഈ വർഷം ആദ്യം ഇന്റർനാഷണൽ ലീഗ് ടി20-യിൽ (ILT20) ഡെസേർട്ട് വൈപ്പേഴ്സിനെ കിരീടത്തിലേക്ക് നയിച്ച മികവുമാണ് താരത്തെ നായകസ്ഥാനത്തേക്ക് എത്തിച്ചത്. 2022-ലെ ടി20 ലോകകപ്പിലെ മികച്ച താരം (Player of the Tournament) കൂടിയായിരുന്നു അദ്ദേഹം.