ഇന്ത്യയ്ക്കെതിരെ ധാക്ക ടെസ്റ്റിൽ ബംഗ്ലാദേശ് രണ്ടാം ഇന്നിംഗ്സിൽ ഏഴ് വിക്കറ്റുകള് നേടുമ്പോള് ജയത്തിനായി ഇനിയും 71 റൺസ് ഇന്ത്യ നേടണമായിരുന്നു. പിന്നീട് വിക്കറ്റ് നഷ്ടമില്ലാതെ ഇന്ത്യ വിജയത്തിലേക്ക് നീങ്ങിയപ്പോള് നഷ്ടപ്പെടുത്തിയ അവസരങ്ങളെ പഴിയ്ക്കുകയാണ് ബംഗ്ലാദേശ് ഇപ്പോള്.
ക്യാച്ചുകള് കൈവിട്ടതും സ്റ്റംപിംഗ് അവസരം നഷ്ടപ്പെടുത്തിയതും ആണ് ടീമിന് വിനയായതെന്നാണ് ക്യാപ്റ്റന് ഷാക്കിബ് അൽ ഹസന് വ്യക്തമാക്കിയത്. അശ്വിന്റെ ക്യാച്ച് മോമിനുള് ഹക്ക് നഷ്ടപ്പെടുത്തിയപ്പോള് താരം പിന്നീട് 42 റൺസുമായി പുറത്താകാതെ നിന്ന് ഇന്ത്യന് വിജയം ഒരുക്കുകയായിരുന്നു.
തങ്ങള് നഷ്ടപ്പെടുത്തുന്നത്ര അവസരങ്ങള് മറ്റു ടീമുകള് നഷ്ടപ്പെടുത്താറില്ലെന്നും അത് നിരാശ നൽകുന്ന കാര്യമാണെന്നും ഷാക്കിബ് സൂചിപ്പിച്ചു. ഈ അവസരങ്ങള് മുതലാക്കിയിരുന്നുവെങ്കില് ഇന്ത്യയുടെ ഒന്നാം ഇന്നിംഗ്സ് 314ന് പകരം 250 റൺസിലൊതുങ്ങിയേനെ എന്നും ഷാക്കിബ് വ്യക്തമാക്കി.