തിളങ്ങാനാകാതെ എബി ഡി വില്ലിയേഴ്സ്, ലാഹോര്‍ ഖലന്തേഴ്സിനെ പരാജയപ്പെടുത്തി ഇസ്ലാമാബാദ് തുടങ്ങി

പാക്കിസ്ഥാന്‍ സൂപ്പര്‍ ലീഗ് 2019ന്റെ ഉദ്ഘാടന മത്സരത്തില്‍ 5 വിക്കറ്റ് വിജയവുമായി ഇസ്ലാമാബാദ് യുണൈറ്റഡ്. ലാഹോര്‍ ഖലന്തേഴ്സിന്റെ 172 റണ്‍സ് ലക്ഷ്യം അഞ്ച് വിക്കറ്റ് നഷ്ടത്തില്‍ 4 പന്ത് അവശേഷിക്കെയാണ് ഇസ്ലാമാബാദ് മറികടന്നത്. ആദ്യം ബാറ്റ് ചെയ്ത ലാഹോറിനു 171 റണ്‍സ് മാത്രമാണ് 8 വിക്കറ്റ് നഷ്ടത്തില്‍ നേടാനായത്. ഫകര്‍ സമന്‍ 43 പന്തില്‍ 65 റണ്‍സ് നേടിയപ്പോള്‍ സൊഹൈല്‍ അക്തര്‍(37), എബി ഡി വില്ലിയേഴ്സ്(24) എന്നിവരും വേഗത്തില്‍ പുറത്തായി. ഫഹീം അഷ്റഫ് 2 വിക്കറ്റ് നേടി.

ഇസ്ലാമാബാദിനായി ബാറ്റിംഗിലിറങ്ങിയ താരങ്ങളാരും വലിയ സ്കോറുകള്‍ നേടിയില്ലെങ്കിലും താരങ്ങളെല്ലാം നല്‍കിയ ശ്രദ്ധേയമായ സംഭാവന ടീമിനു ഗുണം ചെയ്യുകയായിരുന്നു. രാഹത്ത് അലി തന്റെ ഒരോവറില്‍ മൂന്ന് വിക്കറ്റുമായി ഇസ്ലാമാബാദിനെ ബുദ്ധിമുട്ടിച്ചുവെങ്കിലും ഹുസൈന്‍ തലത്(37), ആസിഫ് അലി(36*), ഫഹീം അഷ്റഫ്(23*), കാമറൂണ്‍ ഡെല്‍പോര്‍ട്ട്(24), ലൂക്ക് റോഞ്ചി(27) എന്നിങ്ങനെ ബാറ്റ്സ്മാന്മാരുടെ പ്രകടനം ടീമിനു സഹായകരമാകുകയായിരുന്നു.

രാഹത് അലി നാല് വിക്കറ്റ് നേടിയെങ്കിലും മറ്റു ബൗളര്‍മാര്‍ക്കാര്‍ക്കും വേണ്ടത്ര മികച്ച പ്രകടനം പുറത്തെടുക്കാനാകാതെ പോയതും ലാഹോറിനു തിരിച്ചടിയായി. 4 ഓവറില്‍ 29 റണ്‍സ് മാത്രം വിട്ട് നല്‍കിയാണ് രാഹത് തന്റെ നാല് വിക്കറ്റുകള്‍ വീഴ്ത്തിയത്.