ഋഷഭ് പന്തിന്റെ ഇംഗ്ലണ്ട് പ്രകടനത്തെക്കുറിച്ച് മുഖ്യ സെലക്ടര് എംഎസ്കെ പ്രസാദിന്റെ അഭിപ്രായം ഇപ്രകാരം. ഒരു ബാറ്റ്സ്മാനെന്ന നിലയില് പന്ത് മികച്ച് നിന്നുവെങ്കിലും കീപ്പിംഗില് താരം ഇനിയും ഏറെ മെച്ചപ്പെടാനുണ്ടെന്നാണ് പ്രസാദ് പറഞ്ഞത്. 20 വയസ്സുകാരന് ഋഷഭ് പന്തിനു പ്രത്യേകം പരിശീലന മോഡ്യൂള് സൃഷ്ടിച്ച് താരത്തിന്റെ കീപ്പിംഗ് കഴിവുകള് മെച്ചപ്പെടുത്തേണ്ടതായുണ്ടെന്ന് പ്രസാദ് അഭിപ്രായപ്പെട്ടു. സ്പെഷ്യലിസ്റ്റ് വിക്കറ്റ് കീപ്പിംഗ് കോച്ചിന്റെ സേവനം ഇതിനായി ഉപയോഗിക്കണമെന്നും പ്രസാദ് അഭിപ്രായപ്പെട്ടു.
ഓവലില് ഇന്ത്യ തോറ്റുവെങ്കിലും പന്ത് ശതകം നേടി ശ്രദ്ധേയമായ പ്രകടനം പുറത്തെടുത്തിരുന്നു. എന്നാല് പരമ്പരയിലെ താരത്തിന്റെ കീപ്പിംഗ് ശരാശരിയ്ക്കും താഴെയായിരുന്നു. താരം കീപ്പ് ചെയ്ത ആറ് ഇന്നിംഗ്സുകളിലായി വളരെയേറെ ബൈ റണ്ണുകള് പന്ത് വഴങ്ങിയിരുന്നു. താരത്തിന്റെ ബാറ്റിംഗ് കഴിവും പേടിയില്ലാതെ ബാറ്റ് വീശുന്നതും തന്നെ ഏറെ ആകര്ഷിച്ചുവെന്ന് പറഞ്ഞ പ്രസാദ് എന്നാല് താരം വിക്കറ്റ് കീപ്പിംഗ് മെച്ചപ്പെടുത്തേണ്ടത് ആവശ്യമാണെന്ന് അഭിപ്രായപ്പെട്ടു.