നേപ്പിയറിലെ ആദ്യ ഏകദിനത്തില് ബംഗ്ലാദേശിനെ 232 റണ്സിനു എറിഞ്ഞ് പിടിച്ച് ന്യൂസിലാണ്ട്. ആദ്യം ബാറ്റ് ചെയ്ത ബംഗ്ലാദേശ് 48.5 ഓവറില് ഓള്ഔട്ട് ആവുകയായിരുന്നു. ട്രെന്റ് ബോള്ട്ടും മിച്ചല് സാന്റനറും ഒപ്പം മാറ്റ് ഹെന്റിയും ചേര്ന്നാണ് ബംഗ്ലാദേശിനെ വരിഞ്ഞു മുറുക്കിയത്. 62 റണ്സ് നേടിയ മുഹമ്മദ് മിഥുനും വാലറ്റത്തില് മുഹമ്മദ് സൈഫുദ്ദീനുമാണ് ബംഗ്ലാദേശിനെ 232 റണ്സിലേക്ക് നയിച്ചത്.
മിഥുന് 62 റണ്സ് നേടി പുറത്തായപ്പോള് സൈഫുദ്ദീന് 41 റണ്സ് നേടി പുറത്തായി. സൗമ്യ സര്ക്കാര് അതിവേഗം 30 റണ്സ് നേടിയെങ്കിലും അധികം സമയം ക്രീസില് നില്ക്കാനാകാതെ താരം മടങ്ങിയത് ബംഗ്ലാദേശിനു തിരിച്ചടിയായി. ആതിഥേയര്ക്കായി ബോള്ട്ടും സാന്റനറും മൂന്ന് വീതം വിക്കറ്റും മാറ്റ് ഹെന്റിയും ലോക്കി ഫെര്ഗൂസണും രണ്ട് വീതം വിക്കറ്റും നേടി.