ബംഗ്ലാദേശിന്റെ ഓള്റൗണ്ടര് ഷാക്കിബ് അൽ ഹസനെ കളിപ്പിക്കുന്നതിൽ താന് പൂര്ണ്ണമായി തൃപ്തനല്ലെന്ന് പറഞ്ഞ് ബംഗ്ലാദേശ് മുഖ്യ കോച്ച് റസ്സൽ ഡൊമിംഗോ. താരം 60 ശതമാനം മാത്രം മാച്ച് ഫിറ്റ് ആയതിനാലാണ് ഇതെന്നും ശ്രീലങ്കയ്ക്കെതിരെയുള്ള രണ്ട് മത്സരങ്ങളിൽ താരത്തെ പരിഗണിക്കുക പ്രയാസമായിരിക്കും എന്നും ഡൊമിംഗോ വ്യക്തമാക്കി.
കോവിഡ് പോസിറ്റീവായതിനാൽ ഷാക്കിബ് ആദ്യ ടെസ്റ്റിനുണ്ടാകില്ലെന്നാണ് നേരത്തെ പുറത്ത് വന്ന റിപ്പോര്ട്ടെങ്കിലും താരം പിന്നീട് നെഗറ്റീവായതിനാൽ തന്നെ ടീമിനൊപ്പം പരിശീലനത്തിന് നാളെ ചേരുമെന്നാണ് അറിയുന്നത്.
താരത്തിന് വീണ്ടും മെഡിക്കൽ – ഫിറ്റ്നെസ്സ് ടെസ്റ്റുകള് ഉണ്ടാകുമെന്നും അതിന് ശേഷം മാത്രമേ പരമ്പരയിൽ കളിപ്പിക്കുക എന്നുമാണ് അറിയുന്നത്. കോവിഡ് മാറി വന്നതിനാലും ക്രിക്കറ്റ് അധികം കളിച്ചിട്ടില്ലാത്തതിനാലും വലിയ താരമാണെങ്കിലും ടീമിന്റെ ബാലന്സിന് ഏറെ പ്രാധാന്യമുള്ള താരമാണെങ്കിലും താരത്തെ കളിപ്പിക്കുക ഫിറ്റ്നെസ്സ് കാര്യങ്ങള് നോക്കിയ ശേഷം മാത്രമായിരിക്കുമെന്ന് റസ്സൽ ഡൊമിംഗോ സൂചിപ്പിച്ചു.
