അഹമ്മദാബാദില് നാളെ ആരംഭിയ്ക്കുന്ന ഇന്ത്യയും ഇംഗ്ലണ്ടും തമ്മിലുള്ള മൂന്നാം ടെസ്റ്റില് പേസര് ഉമേഷ് യാദവിന് അവസരം ലഭിച്ചേക്കില്ല എന്ന് പറഞ്ഞ് ഗൗതം ഗംഭീര്. ഉമേഷ് യാദവിനെ പരിക്ക് മൂലം ആദ്യ രണ്ട് മത്സരങ്ങളില് പരിഗണിച്ചില്ലെങ്കിലും താരത്തെ അവസാന രണ്ട് ടെസ്റ്റിനുള്ള സ്ക്വാഡിലേക്ക് ഉള്പ്പെടുത്തുകയായിരുന്നു.
ഓസ്ട്രേലിയയില് മെല്ബേണ് ടെസ്റ്റിനിടെ ആണ് താരത്തിന് പരിക്കേറ്റത്. എന്നാല് ഇഷാന്ത് ശര്മ്മ, ജസ്പ്രീത് ബുംറ, മുഹമ്മദ് സിറാജ് എന്നിവരടങ്ങിയ പേസ് ബൗളിംഗ് സഖ്യത്തിനെ മാറ്റി ഇന്ത്യ ഉമേഷിന് മൂന്നാം ടെസ്റ്റില് അവസരം നല്കുവാന് സാധ്യതയില്ലെന്നാണ് മുന് ഇന്ത്യന് താരം ഗൗതം ഗംഭീറിന്റെ അഭിപ്രായം.
ഇന്ത്യ മൂന്ന് പേസര്മാരുമായി മത്സരത്തെ സമീപിക്കുകയാണെങ്കില് ഉമേഷിന് സാധ്യതയില്ലെന്നാണ് താന് കരുതുന്നതെന്ന് ഗംഭീര് പറഞ്ഞു. സിറാജിന്റെ അരങ്ങേറ്റം മികച്ചതായിരുന്നുവെന്നും താരം അതിന് ശേഷമുള്ള മത്സരങ്ങളിലും മികച്ച രീതിയിലാണ് പന്തെറിഞ്ഞതെന്നും ഗംഭീര് വ്യക്തമാക്കി.