ബുധനാഴ്ച ഐസിസി റാങ്കിങ്ങിൽ ബംഗ്ലാദേശിൻ്റെ ഷാക്കിബ് അൽ ഹസനെ മറികടന്ന് അഫ്ഗാനിസ്ഥാൻ്റെ മുഹമ്മദ് നബി ഏകദിന ഓൾറൗണ്ടർ റാങ്കിംഗിൽ ഒന്നാം സ്ഥാനത്തെത്തി. ഇതിന് മുമ്പ് അഞ്ച് വർഷത്തിലേറെ ഷാക്കിബ് ആയിരുന്നു ഈ സ്ഥാനത്ത് ഉണ്ടായിരുന്നത്.
കഴിഞ്ഞ വർഷം ഇന്ത്യയിൽ നടന്ന ഏകദിന ലോകകപ്പിന് ശേഷം ഷാക്കിബ് ബംഗ്ലാദേശിനായി കളിച്ചിട്ടില്ല. കൂടാതെ കണ്ണിൻ്റെ അസുഖം കാരണം ശ്രീലങ്കയ്ക്കെതിരായ അവരുടെ വരാനിരിക്കുന്ന വൈറ്റ് ബോൾ പരമ്പരയിൽ നിന്നും ഷാക്കിബ് മാറിനിൽക്കുകയാണ്.
ശ്രീലങ്കയ്ക്കെതിരായ മൂന്ന് മത്സരങ്ങളുടെ പരമ്പരയിലെ ആദ്യ ഏകദിനത്തിൽ 136 റൺസ് നേടിയതിന് ശേഷമാണ് നബി ഒന്നാം സ്ഥാനത്തേക്ക് എത്തിയത്. ഏകദിന ബൗളർമാരുടെ റാങ്കിങ്ങിൽ ഒരു സ്ഥാനം മെച്ചപ്പെടുത്തി ഏഴാം സ്ഥാനത്തെത്തിയ നബിയും ഇതേ കളിയിൽ ഒരു വിക്കറ്റും വീഴ്ത്തിയിരുന്നു.