ബംഗ്ലാദേശിനെതിരെ ഇപ്പോള് നടക്കുന്ന അഫ്ഗാനിസ്ഥാന്റെ ഏക ടെസ്റ്റിന് ശേഷം ടെസ്റ്റ് ഫോര്മാറ്റില് നിന്ന് വിരമിക്കുമെന്ന് അറിയിച്ച് മുഹമ്മദ് നബി. താരം വൈറ്റ് ബോള് ക്രിക്കറ്റില് ശ്രദ്ധ കേന്ദ്രീകരിക്കുന്നതിന്റെ ഭാഗമായാണ് ടെസ്റ്റില് നിന്ന് വിരമിക്കുന്നതെന്നാണ് വിലയിരുത്തപ്പെടുന്നത്. 34 വയസ്സുകാരന് നബി അഫ്ഗാനിസ്ഥാന് വേണ്ടി മൂന്ന് ടെസ്റ്റുകളാണ് കളിച്ചിട്ടുള്ളത്. അഫ്ഗാനിസ്ഥാന് അത്രയധികം ടെസ്റ്റ് മത്സരങ്ങളില്ല എന്നതും ഈ തീരുമാനത്തിന് പിന്നിലുണ്ട്. അടുത്ത നവംബര്-ഡിസംബറില് വിന്ഡീസിനെതിരാണ് അഫ്ഗാനിസ്ഥാന്റെ അടുത്ത ടെസ്റ്റ്.
അതേ സമയം ടി20യില് താരം മൂല്യമേറിയ താരമാണ്. വിവിധ ഫ്രാഞ്ചൈസി ലീഗുകളിലെ അവിഭാജ്യ ഘടകമായ താരമാണ് മുഹമ്മദ് നബി. 2020 ഐസിസി ടി20 ലോകകപ്പിലും നബി അഫ്ഗാനിസ്ഥാന്റെ സാധ്യതകളെ സ്വാധീനിക്കുന്ന താരമായിരിക്കുമെന്നാണ് കരുതപ്പെടുന്നത്.