ഇംഗ്ലണ്ടിന്റെ ബാര്മി ആര്മിയില് നിന്ന് മാന്യമായ പെരുമാറ്റം പന്ത് ചുരണ്ടല് വിവാദത്തില് പെട്ട ഓസ്ട്രേലിയന് താരങ്ങളായ സ്റ്റീവന് സ്മിത്തിനും ഡേവിഡ് വാര്ണര്ക്കും ലഭിയ്ക്കുമെന്ന പ്രതീക്ഷയില് ഇംഗ്ലണ്ട് ഓള്റൗണ്ടര് മോയിന് അലി. ഒരു വര്ഷത്തെ വിലക്കിനു ശേഷം ഓസ്ട്രേലിയയ്ക്കായി കളിയ്ക്കാനെത്തുന്ന താരങ്ങളെ ഇംഗ്ലണ്ടിന്റെ വിഖ്യാതമായ ആരാധക്കൂട്ടം എങ്ങനെ വരവേല്ക്കുമെന്ന പ്രതീക്ഷയിലാണ് ക്രിക്കറ്റ് ലോകം.
താരങ്ങള്ക്ക് ടൂര്ണ്ണമെന്റ് ആസ്വദിക്കാനാകണമെന്നാണ് തന്റെ ആഗ്രഹമെന്നാണ് മോയിന് അലി പറഞ്ഞത്. കാര്യങ്ങള് വ്യക്തിപരമായി ആകാതെ രസകരമായ വിധത്തില് നിലനിന്നാല് കാര്യങ്ങള് ആസ്വാദ്യകരമാകും. ഞങ്ങള് ക്രിക്കറ്റ് താരങ്ങളും മനുഷ്യരാണ്, വികാരങ്ങള്ക്കും മറ്റും ഉടമകള്. വാര്ണറും സ്മിത്തും നല്ല വ്യക്തികളാണ്, അവര്ക്ക് മാന്യമായ പ്രതികരണങ്ങള് ലഭിയ്ക്കണമെന്നാണ് തന്റെ ആഗ്രഹം. അവരുടെ ക്രിക്കറ്റ് മാത്രമാകണം വിലയിരുത്തപ്പെടേണ്ടത് എന്നും മോയിന് അലി പറഞ്ഞു.