ലങ്ക പ്രീമിയര്‍ ലീഗില്‍ മഴ തടസ്സം സൃഷ്ടിച്ച മത്സരത്തില്‍ കാന്‍ഡി ടസ്കേഴ്സിനെതിരെ 4 റണ്‍സിന്റെ വിജം നേടി ഡാംബുല്ല വൈക്കിംഗ്സ്. ഇന്ന് നടന്ന മത്സരത്തില്‍ ആദ്യം ബാറ്റ് ചെയ്ത വൈക്കിംഗ്സ് 195/4 എന്ന മികച്ച സ്കോറാണ് നേടിയത്. ദസുന്‍ ഷനക(73), സമിത് പട്ടേല്‍(58) എന്നിവരുടെ തകര്‍പ്പന്‍ ബാറ്റിംഗ് പ്രകടനം ആണ് ഡാംബുല്ലയ്ക്ക് മികച്ച സ്കോര്‍ നേടിക്കൊടുത്തത്.
ഇരുവരും ചേര്‍ന്ന് മൂന്നാം വിക്കറ്റില്‍ 128 റണ്‍സ് കൂട്ടുകെട്ടാണ് നേടിയത്. 37 പന്തില്‍ നിന്ന് ഷനക 73 റണ്‍സ് നേടിയപ്പോള്‍ സമിത് പട്ടേല്‍ 38 പന്തില്‍ നിന്നാണ് 58 റണ്‍സ് നേടിയത്. ടസ്കേഴ്സിന് വേണ്ടി നവീന്‍ ഉള്‍ ഹക്ക്, അസേല ഗുണരത്നേ എന്നിവര്‍ രണ്ട് വിക്കറ്റ് നേടി.
മറുപടി ബാറ്റിംഗിനിറങ്ങിയ കാന്‍ഡി 9.4 ഓവറില്‍ 84/3 എന്ന നിലയില്‍ എത്തിയപ്പോളാണ് മത്സരം മഴ തടസ്സപ്പെടുത്തിയത്. 88 റണ്‍സായിരുന്നു 9.4 ഓവറില്‍ ടീം നേടേണ്ടിയിരുന്നത്. 18 പന്തില്‍ 30 റണ്‍സ് നേടിയ റഹ്മാനുള്ള ഗുര്‍ബാസും 26 പന്തില്‍ 34 റണ്‍സുമായി കുശല്‍ മെന്‍ഡിസും മികച്ച രീതിയില്‍ ടസ്കേഴ്സിനെ മുന്നോട്ട് നീക്കിയെങ്കിലും ജയം 4 റണ്‍സിന് അകലെയായി മഴ തസ്കേഴ്സില്‍ നിന്ന് തട്ടിയെടുക്കുകയായിരുന്നു.
