ജന്മദിനം ആഘോഷമാക്കി ഡേവിഡ് വാര്‍ണര്‍, വാര്‍ണറെ വെല്ലും പ്രകടനവുമായി സാഹയും

Sports Correspondent

Download the Fanport app now!
Appstore Badge
Google Play Badge 1

ഡേവിഡ് വാര്‍ണറും വൃദ്ധിമന്‍ സാഹയും ടോപ് ഓര്‍ഡറില്‍ അടിച്ച് തകര്‍ത്തപ്പോള്‍ ഡല്‍ഹി ക്യാപിറ്റല്‍സിനെതിരെ പടുകൂറ്റന്‍ സ്കോര്‍ നേടി സണ്‍റൈസേഴ്സ് ഹൈദ്രാബാദ്. സാഹ 87 റണ്‍സുമായി ടോപ് സ്കോറര്‍ ആയപ്പോള്‍ ഡേവിഡ് വാര്‍ണര്‍ 66 റണ്‍സ് നേടി പുറത്താകുകയായിരുന്നു. 190ലധികം സ്ട്രൈക്ക് റേറ്റിലാണ് സാഹയും വാര്‍ണറും സ്കോര്‍ ചെയ്തത്. മനീഷ് പാണ്ടേയും മികവ് പുലര്‍ത്തിയപ്പോള്‍ 2 വിക്കറ്റ് നഷ്ടത്തില്‍ 219 റണ്‍സാണ് സണ്‍റൈസേഴ്സ് നേടിയത്.

Warnersaha

ജോണി ബൈര്‍സ്റ്റോയ്ക്ക് പകരം ടീമിലെത്തിയ വൃദ്ധിമന്‍ സാഹയാണ് ആദ്യം ആക്രമിച്ച് തുടങ്ങിയതെങ്കിലും ഡേവിഡ് വാര്‍ണര്‍ പവര്‍പ്ലേയ്ക്കുള്ളില്‍ തന്നെ തന്റെ അര്‍ദ്ധ ശതകം പൂര്‍ത്തിയാക്കുന്നതാണ് പിന്നീട് കണ്ടത്. പത്താം ഓവറില്‍ അശ്വിന്റെ ഓവറില്‍ അക്സര്‍ പട്ടേല്‍ വാര്‍ണറെ വീഴ്ത്തുമ്പോള്‍ 34 പന്തില്‍ നിന്ന് 66 റണ്‍സാണ് സണ്‍റൈസേഴ്സ് നായകന്‍ നേടിയത്.

8 ഫോറും 2 സിക്സും അടക്കം നേടിയ താരം ഒന്നാം വിക്കറ്റില്‍ 107 റണ്‍സാണ് സാഹയോടൊപ്പം നേടിയത്. വാര്‍ണര്‍ പുറത്തായ ശേഷം വൃദ്ധിമന്‍ സാഹ തന്റെ മികവാര്‍ന്ന ബാറ്റിംഗ് പ്രകടനം തുടരുന്ന കാഴ്ചയാണ് കണ്ടത്. വാര്‍ണര്‍ക്ക് പകരം ക്രീസിലെത്തിയ മനീഷ് പാണ്ടേയെ കാഴ്ചക്കാരനാക്കി സാഹ തന്റെ വെടിക്കെട്ട് പ്രകടനം തുടര്‍ന്നപ്പോള്‍ ഡല്‍ഹി ക്യാപ്റ്റന്‍ ശ്രേയസ്സ് അയ്യര്‍ക്ക് തൊടുന്നതെല്ലാം പിഴയ്ക്കുന്ന കാഴ്ചയാണ് കണ്ടത്.

15ാം ഓവറില്‍ ശ്രേയസ്സ് അയ്യര്‍ പിടിച്ച് പുറത്താകുമ്പോള്‍ തന്റെ ശതകത്തിന് 13 റണ്‍സ് അകലെയായിരുന്നു വൃദ്ധിമന്‍ സാഹ. ആന്‍റിക് നോര്‍ക്കിയയ്ക്കാണ് വിക്കറ്റ്. രണ്ടാം വിക്കറ്റില്‍ 29 പന്തില്‍ നിന്ന് 63 റണ്‍സാണ് സാഹ-പാണ്ടേ കൂട്ടുകെട്ട് നേടിയത്. ഇതില്‍ പാണ്ടേ നേടിയത് 11 റണ്‍സാണ്.

മൂന്നാം വിക്കറ്റില്‍ 49 റണ്‍സ് കൂട്ടുകെട്ടുമായി മനീഷ് പാണ്ടേ – കെയിന്‍ വില്യംസണ്‍ കൂട്ടുകെട്ട് സണ്‍റൈസേഴ്സിനെ 219 റണ്‍സിലേക്ക് എത്തിയ്ക്കുകയായിരുന്നു. മനീഷ് 44 റണ്‍സും വില്യംസണ്‍ 11 റണ്‍സുമാണ് നേടിയത്.