ഇന്ത്യൻ പ്രീമിയർ ലീഗ് അനിശ്ചിത കാലത്തേക്ക് നീട്ടിവെച്ചതിന് പിന്നാലെ ഐ.പി.എല്ലിന് ആതിഥേയത്വം വഹിക്കാമെന്ന വാഗ്ദാനവുമായി ശ്രീലങ്ക. ശ്രീലങ്കൻ ക്രിക്കറ്റ് മേധാവി ഷമ്മി സിൽവയാണ് ഐ.പി.എല്ലിന് ആതിഥേയത്വം വഹിക്കാൻ ശ്രീലങ്ക തയ്യാറാണെന്ന് അറിയിച്ചത്.
ഇന്ത്യയിൽ കൊറോണ വൈറസിന്റെ വ്യാപനം നിൽക്കുന്നതിന് മുൻപ് തന്നെ ശ്രീലങ്കയിൽ വ്യാപനം നിൽക്കുമെന്നും അത്കൊണ്ട് ശ്രീലങ്കയിൽ വെച്ച് ടൂർണമെന്റ് നടത്താമെന്നും ശ്രീലങ്കൻ ക്രിക്കറ്റ് മേധാവി വ്യക്തമാക്കി. ഈ കാര്യം അറിയിച്ച് ബി.സി.സി.ഐക്ക് കത്ത് എഴുതുമെന്നും ഷമ്മി സിൽവ അറിയിച്ചു.
നേരത്തെ മാർച്ച് 29ന് നടക്കേണ്ടിയിരുന്ന ഇന്ത്യൻ പ്രീമിയർ ലീഗ് ഇന്ത്യയിൽ കൊറോണ വൈറസ് വ്യാപിച്ചതിനെ തുടർന്ന് ഏപ്രിൽ 15ലേക്കും തുടർന്ന് ഇന്ത്യയിൽ ലോക്ക് ഡൗൺ നീട്ടിയതിനെ തുടർന്ന് അനിശ്ചിതമായും നീട്ടിവെച്ചിരുന്നു.
