ഫെബ്രുവരി 18ന് ചെന്നൈയില്‍ നടക്കുന്ന ഐപിഎല്‍ ലേലത്തില്‍ 292 താരങ്ങള്‍ക്ക് അവസരമുണ്ടാകുമെന്ന് അറിയിച്ച് ബിസിസിഐ. നേരത്തെ 1114 താരങ്ങള്‍ ആണ് ലേലത്തില്‍ പങ്കെടുക്കുവാന്‍ താല്പര്യം അറിയിച്ച് പേര് രജിസ്റ്റര്‍ ചെയ്തത്. ഇതില്‍ നിന്ന് എട്ട് ഫ്രാഞ്ചൈസികള്‍ നല്‍കിയ തങ്ങളുടെ താല്പര്യത്തിലെ ലിസ്റ്റാണ് ഈ പുതിയ പട്ടിക.
ഇതില്‍ 164 ഇന്ത്യന്‍ താരങ്ങളും 125 വിദേശ താരങ്ങളും അസോസ്സിയേറ്റ് രാജ്യത്തിലെ പ്രതിനിധികളായി മൂന്ന് പേരുമുണ്ട്. മലയാളി താരം ശ്രീശാന്ത് ഈ പട്ടികയില്‍ ഇല്ല എന്നാണ് ലഭിയ്ക്കുന്ന വിവരം. ഒരു ഫ്രാഞ്ചൈസിയും താരത്തിനെ ആവശ്യമാണെന്ന താല്പര്യം അറിയിച്ചില്ലെന്നാണ് അറിയുവാന്‍ കഴിയുന്നത്.
നിരവധി ടീമുകള്‍ തന്നെ തിരഞ്ഞെടുക്കുവാന്‍ താല്പര്യം പ്രകടിപ്പിച്ചതിനാലാണ് ശ്രീശാന്ത് ഐപിഎല്‍ ലേലത്തിനായി പേര് രജിസ്റ്റര്‍ ചെയ്തതെന്നാണ് മുമ്പ് വ്യക്തമാക്കിയത്.
