ഐപിഎല്‍ 2019 സീസണില്‍ ബംഗ്ലാദേശിന്റെ മുസ്തഫിസുര്‍ റഹ്മാന്‍ കളിക്കില്ല. താരത്തിനു ബംഗ്ലാദേശ് ക്രിക്കറ്റിന്റെ അനുമതി ലഭിയ്ക്കാത്തതാണ് കാരണം. ബംഗ്ലാദേശ് ക്രിക്കറ്റ് ബോര്‍ഡ് താരത്തിനുള്ള എന്‍ഒസി കൊടുക്കേണ്ടതില്ലെന്ന് തീരുമാനിക്കുകയായിരുന്നു. ലോകകപ്പ് ആസന്നമായ സാഹചര്യത്തില്‍ താരത്തിന്റെ ഫിറ്റ്നെസില്‍ മുമ്പും വീഴ്ച പറ്റിയതിനാലാണ് ഈ തീരുമാനം.
കഴിഞ്ഞ സീസണില്‍ ഐപിഎലിനിടെ പരിക്കേറ്റ് താരത്തിനു ഏറെ നാള്‍ പുറത്തിരിക്കേണ്ടി വന്നിരുന്നു. 2016ല്‍ ഹൈദ്രാബാദിന്റെ കപ്പ് നേടിയ ടീമിലംഗമായിരുന്ന മുസ്തഫിസുറിനെ കഴിഞ്ഞ സീസണില്‍ മുംബൈ ഇന്ത്യന്‍സ് സ്വന്തമാക്കുകയായിരുന്നു.
അതേ സമയം 9 താരങ്ങള്‍ക്ക് ബംഗ്ലാദേശ് ലേലത്തില്‍ പങ്കെടുക്കുവാന്‍ അനുമതി നല്‍കിയിട്ടുണ്ട്. തമീം ഇക്ബാല്‍, മുഷ്ഫിക്കുര്‍ റഹിം, മഹമ്മദുള്ള, സൗമ്യ സര്‍ക്കാര്‍, ലിറ്റണ്‍ ദാസ്, നയീം ഹസന്‍, ഇമ്രുല്‍ കൈസ്, അബു ഹൈദര്‍, സബ്ബിര്‍ റഹ്മാന്‍ എന്നിവരാണ് അവര്‍.
