എവേ വിക്കറ്റുകള്‍ ബാറ്റ്സ്മാന്മാര്‍ക്ക് ഗുണം ചെയ്യുന്നു – ശ്രേയസ്സ് അയ്യര്‍

ഹോം ഗ്രൗണ്ടിലേതിനെക്കാള്‍ ഡല്‍ഹി ബാറ്റ്സ്മാന്മാര്‍ക്ക് ഏറെ ഗുണം ചെയ്യുന്നത് എവേ വിക്കറ്റുകളിലാണെന്ന് വ്യക്തമാക്കി ഡല്‍ഹി ക്യാപിറ്റല്‍സ് നായകന്‍ ശ്രേയസ്സ് അയ്യര്‍. ഡല്‍ഹിയിലെ പിച്ചിലൊഴികെ മികച്ച വിക്കറ്റില്‍ കളിയ്ക്കുവാന്‍ ഞങ്ങളുടെ ബാറ്റ്സ്മാന്മാര്‍ക്ക് ഭാഗ്യം ഉണ്ടായിട്ടുണ്ട്. ടീമിനു ഇന്ന് ലഭിച്ച തുടക്കത്തില്‍ താന്‍ ഏറെ സന്തോഷവാനാണ് എന്നും ശ്രേയസ്സ് അയ്യര്‍ പറഞ്ഞു.

ടീം ക്യാമ്പില്‍ പോസിറ്റിവിറ്റി നിറയുകയാണെന്നും ജയത്തിനു ശേഷം സംസാരിക്കവേ ശ്രേയസ്സ്  അയ്യര്‍ പറഞ്ഞു. ഒരു ഘട്ടത്തില്‍ രാജസ്ഥാന്‍ 200നു മുകളില്‍ സ്കോര്‍ നേടുമെന്ന് തോന്നിപ്പിച്ചുവെങ്കിലും റബാഡ അവസാന ഓവറുകളില്‍ മത്സരം തിരികെ പിടിയ്ക്കുകയായിരുന്നു. ശിഖര്‍ പുറത്തായ ശേഷം ഋഷഭ് പന്ത് ടീമിനെ ലക്ഷ്യത്തിലേക്ക് എത്തിയ്ക്കുകയായിരുന്നുവെന്നും ശ്രേയസ്സ് പറഞ്ഞു.

ടീം മീറ്റിംഗുകളില്‍ റിക്കി പോണ്ടിംഗ് പറഞ്ഞ കാര്യം താരങ്ങള്‍ ശിരസ്സാവഹിക്കുകയാണെന്നും ശ്രേയസ്സ് പറഞ്ഞു. തുടക്കം ലഭിയ്ക്കുന്ന താരങ്ങള്‍ അവസാനം വരെ ക്രീസില്‍ നില്‍ക്കണമെന്നായിരുന്നു റിക്കി പോണ്ടിംഗിന്റെ ആവശ്യം. ഇന്ന് ഋഷഭ് ആ  ചുമതല ഏറ്റെടുത്തപ്പോള്‍ കഴിഞ്ഞ മത്സരത്തില്‍ താനും അതിനു മുമ്പ് ശിഖറും ആ ഉത്തരവാദിത്വം നിറവേറ്റിയെന്ന് ശ്രേയസ്സ് അയ്യര്‍ പറഞ്ഞു.