വാങ്കഡേയില്‍ പൊള്ളാര്‍ഡ് ഷോവാണ് കളം നിറഞ്ഞതെങ്കിലും ഏറെ നിര്‍ണ്ണായകമായൊരു പ്രകടനം പുറത്തെടുത്ത മറ്റൊരു വിന്‍ഡീസ് താരത്തെ ആരും മറക്കരുത്. അത് 36 പന്തില്‍ നിന്ന് 63 റണ്‍സ് നേടിയ യൂണിവേഴ്സ് ബോസ് അല്ല എന്നാല്‍ 13 പന്തില്‍ നിന്ന് 15 റണ്‍സ് നേടി പുറത്താകാതെ നിന്ന് പൊള്ളാര്‍ഡ് പുറത്തായ ശേഷം പതറാതെ മുംബൈയെ വിജയത്തിലേക്ക് നയിച്ച അല്‍സാരി ജോസഫിന്റെ പ്രകടനമാണ്.
മുംബൈയുടെ പേര് കേട്ട ബാറ്റിംഗ് നിര പൊള്ളാര്‍ഡിനു പിന്തുണ നല്‍കാതെ മടങ്ങിയപ്പോളാണ് ഏഴാം വിക്കറ്റില്‍ അല്‍സാരി ജോസഫ് ക്രീസിലെത്തുന്നത്. ഇന്ന് ബൗളിംഗില്‍ രണ്ടോവര്‍ മാത്രമാണ് താരത്തിനു ലഭിച്ചത് അതില്‍ 22 റണ്‍സും വഴങ്ങി. എന്നാല്‍ പൊള്ളാര്‍ഡിനു കൂട്ടായി ഏഴാം വിക്കറ്റില്‍ താരം ഒപ്പം നിന്നപ്പോള്‍ കൂട്ടുകെട്ട് നേടിയത് 54 റണ്‍സാണ്.
സ്കോറിംഗ് ഭൂരിഭാഗവും നടത്തിയത് കീറണ്‍ പൊള്ളാര്‍ഡ് ആയിരുന്നുവെങ്കിലും മിന്നും ഫോമില്‍ പന്തെറിഞ്ഞ മുഹമ്മദ് ഷമിയെ രണ്ടോവറിലായി രണ്ട് ബൗണ്ടറി നേടി താരം മത്സരത്തില്‍ നിര്‍ണ്ണായക പങ്കാണ് വഹിച്ചത്. പൊള്ളാര്‍ഡ് പുറത്തായ ശേഷം നാല് പന്തില്‍ നാലെന്ന് നിലയില്‍ നിന്ന് ടീമിനെ മൂന്ന് വിക്കറ്റ് വിജയത്തിലേക്ക് എത്തിക്കുവാനും അല്‍സാരി ജോസഫിനു സാധിച്ചു.
