യുപി വാരിയേഴ്സിനെതിരെ മികച്ച ബൗളിംഗ് പ്രകടനുമായി റോയൽ ചലഞ്ചേഴ്സ് ബാംഗ്ലൂര്. സോഫി ഡിവൈനും ആശ ശോഭനയും പെറിയും ബൗളിംഗ് മികവ് പുറത്തെടുത്ത മത്സരത്തിൽ യുപിയെ 135 റൺസിനാണ് ആര്സിബി എറിഞ്ഞ് പിടിച്ചത്. നൂറ് പോലും കടക്കില്ല എന്ന സ്ഥിതിയിൽ നിന്ന് യുപിയെ ഗ്രേസ് ഹാരിസ് – ദീപ്തി ശര്മ്മ കൂട്ടുകെട്ടാണ് മാന്യമായ സ്കോറിലേക്ക് എത്തിച്ചത്.
ആദ്യ ഓവറിൽ തന്നെ ദേവിക വൈദ്യയെയും അലൈസ ഹീലിയെയും സോഫി ഡിവൈന് പുറത്താക്കിയപ്പോള് യുപിയുടെ സ്കോര് ബോര്ഡിൽ 2 റൺസ് മാത്രമായിരുന്നു. മെഗാന് ഷൂട്ട് രണ്ടാം ഓവറിൽ താഹ്ലിയ മഗ്രാത്തിനെ പുറത്താക്കിയപ്പോള് 5/3 എന്ന നിലയിലേക്ക് യുപി വീണു.
ആശ ശോഭന കിരണിനെയും സിമ്രാന് ഷെയ്ഖിനെയും പുറത്താക്കിയപ്പോള് യുപി 31/5 എന്ന നിലയിലായി. കിരൺ നാവ്ഗിരേ 22 റൺസ് നേടിയപ്പോള് 46 റൺസ് നേടിയ ഗ്രേസ് ഹാരിസ് ആണ് മറ്റൊരു പ്രധാന സ്കോറര്.
ഗ്രേസ് ഹാരിസ് – ദീപ്തി ശര്മ്മ കൂട്ടുകെട്ട് ആറാം വിക്കറ്റിൽ 69 റൺസ് നേടി യുപിയെ തിരികെ ട്രാക്കിലേക്ക് എത്തിയ്ക്കുമെന്ന് കരുതിയ നിമിഷത്തിലാണ് എൽസെ പെറി ഒരേ ഓവറിൽ 22 റൺസ് നേടിയ ദീപ്തിയെയും 46 റൺസ് നേടിയ ഹാരിസിനെയും പുറത്താക്കിയത്.
ഒരു ഘട്ടത്തിൽ യുപി സ്കോര് നൂറ് പോലും കടക്കില്ലെന്ന നിലയിൽ നിന്നാണ് ഗ്രേസ് ഹാരിസ് – ദീപ്തി കൂട്ടുകെട്ട് ടീമിനെ തിരികെ മത്സരത്തിലേക്ക് കൊണ്ടുവന്നത്.